[ستايش]

المشاركة الأصلية كتبت بواسطة blabla

السلام عليكم ورحمة الله وبركاته
حبيت استفسر من طلبة جامعة البحرين بشكل عام ومن طلبة كلية ادارة الاعمال تحديدا عن طبيعة الدراسة وكمية الجهد الي لازم ينبدل حق احصل معدل تراكمي ممتاز وبعد هل نفس ما نقرأ في تويتر و غيره انه حياتك بتكون دراسة وبس مافي مجال للامور الحياتية الباقية يعني سوني و مباريات و طلعات وما شابه ذلك وبعد تخصص ادارة اعمال في جامعة البحرين يتطلب معاهد و دروس خصوصية بشكل كبير لو متوسط لو شوي ؟؟


أتمنى الكل يشارك ويعطيني رأيه حق استفيد
وإذا في مواضيع سابقة بهذا الشأن الرجاء تَحُطُّون الرابط مال هالمواضيع في التعليقات و معذرة على الاطالة

وعليكم السلام

كلية إدارة الأعمال بعد تنقسم لتخصصات
1- صيرفة وتمويل
2- تسويق
3-إدارة أعمال
4- محاسبة
صيرفة إسلامية

في أول سنتين الغالب مواد مشتركة بين تخصصات الكلية
طالب/ة البزنس عشان يتخرج /تتخرج من الكلية مطلوب منه اجتياز128 بما يعادل 43 مادة منهم 19 مادة مشتركة لجميع تخصصات البزنس و9 مواد تخصصية و3 مواد اختيارية من خارج الكلية إضافة إلى التدريب العملي
غالب المواد 3ساعات بستثناء مادة حقوق الأنسان المشتركة ساعتين

المواد مخلوطة
في مواد كلكوليشن (حسابات وقوانين وتعويض تحتاج فهم )
في مواد نظرية ( كله معلومات ومحتاجة حفظ )
في مواد مكس بين الأثنين نظري وعملي

كمية الجهد هذا على الطالب/ة قدرتكم على الحفظ أكثر لو الفهم أكثر لو في الأثنين تمام و اللغة الأنجليزية ممتازة لو متوسطة لو ضعيفة طريقتكم وأسلوبكم في الدراسة عدكم تنظيم ل الوقت لو الدراسة ليلة الأمتحان فقط لو تدرسون على فترات .......الخ

في الجامعة
البعض يهلك روحه يبي ينجح ويجيب درجات زينة بس بالزور ينجح
والبعض ما شاء الله عليه ما يتعب روحه واجد بس ينجح ويحصل درجات أحسن من اللي يهلك روحه
هذا الشي ببتلاحظونها إذا دخلتون الجامعة

ما عليك من تويتر يمكن فيه شوي مبالغات وكنوع من الفضفضة والتنفيس عن النفس أو ممكن يكونون من فئة الطلاب اللي ما يحصلون درجات زينة وما يدرسون فيجون يقولون ليك صعب إذا ما درست أكيد بكون صعب

الحياة ماشية ونسوي اللي نبيه بس بعد يعتمد على الشخص وطريقة تنظيمه للوقت وترتيبه ل الأولويات

آخيراً على سالفة المعاهد والدروس الخصوصية يحتاج لو لا ؟
هي فعلا موجودة ويا كثر الأعلانات والمدرسين الخصوصين وبعد أشوف الحين عدنه في الجامعة بعض الطلبة يتبرعون ويشرحون لزملائهم بدون مقابل
بس إذا سجلت وي دكاترة تمام وتفهم ليهم في مواد (الماث والأيكون والأكاونت ) ما بتحتاج معاهد أو مثلا إنه عندك قدرة تدرس وتفهم بروحك في بعض المواد ممكن يكون يدرسه بس دكتور واحد وكلش ما تفهم ليه ولا تقبض منه شي تظطر تروح معهد