في البداية ابي اقول ان في رأيي ما يصير احد يقول اي واحد احسن من الثاني لان هذا بكون رأيك الشخصي و مافي تصنيف حق هاي الجامعات... يعني لو تقول لي جامعة هارفرد ولا الخليج او الايرلندية فالجواب سهل. ثاني شي ان انت بتدش الجامعة بتدرس عشان تحصل شهادة تخليك تمارس المهنة و مثل ما قال اخونا تصير دكتور مو مهم انت من اي جامعة. اهم شي وهاي الشي للاسف الكثير من الطلبة ينسونه هو الخبرة. الي بصير دكتور زين هو الي عنده خبرة زينة و هاي الشي الجامعة تقدم لك بس كله عليك انت لازم تتعب. و التعب مو بس دراسة حق امتحاناتك. يمكن طالب يتخرج بتفوق و واحد لا بس الي بدون تفوق احسن لان قعد في المستشفى اكثر...
انا طالب طب من الايرلندية ما بقولكم ان الايرلندية احسن لان ما عندي خبرة عن الخليج بس اقدر اقولكم الي اعرفه من ربعي الي هناك و اتمنى من طلبة الخليج يصححوني اذا معلوماتي غلط.
انا جفت الست نقاط الي كتبها اخوي و قلت بركز عليهم حق هاي الرد و بعدين اذا في نقاط ثانية نقدر نتحجى عنها:
١ - انت غلطان اخوي، الايرلندية شهادتها مو من البحرين بس. تحصل ثلاث شهادات: شهادة بكالريوس في الطب من الجامعة الوطنية في ايرلندا و شهادة بكالريوس من البحرين و ليسن من ايرلندا (هاي ما عليكم منها الايرلنديين وايد تقليديين). يعني عندك شهادتين بكالريوس تقدر تحط اي واحد على صوب. صح كلامك، المجلس الطبي في ايرلندا ما عطاهم الاعتماد بس تعرف هاي لان الجامعة مو في ايرلندا لان حتى جامعات ماليزيا ما عندهم الاعتماد. يعني مثل ما يكون لجامعات برا اعتماد عند وزارة التربية بس مو في الصحة لان جامعات مال برا. يصير تسوي سنة الامتياز هناك لان غير حق كل تخصص. مثلا جراحة تقدم على الكلية الملكية للجراحين و لازم تتدفع جنه الف يورو و جنه سنتين. بس انك تشتغل بعدين صعب لان الافضلية حق الايرلنديين و الاوروبيين بس سنة الامتياز اوكي. المشكلة ان بتجازف... تروح مناك حق امتياز و ما تحصل حق السنوات الباقية لازم ترجع البحرين من جذي ما يروحون وايد ناس و انا اعرف ثلاثة العام راحوا و رجعوا و الحين واحد في السلمانية و ثنين في الملك حمد. و بالنسبة للخليج فشهادتها قوية في دول الخليج بس حتى لو البحريني بروح بقدم قطر او الكويت فما عنده الاولوية لان الاولوية حق طلبتهم.
٢- هو مثل ما قلت، مو مهم عدد الشهادات لان بكالريوس الطب مال الايرلندية يساوي شهادة الدكتور في الطب من الخليج و البكالريوس في العلوم الطبية مال الخليج ما تسوي شي بس لو ما بتكمل آخر سنتين فزين لان يكون عندك شهادة علوم طبية. حتى احنا اذا ما كملنا اخر سنتين يعطونا شهادة بكالريوس في العلوم الطبية بس الفرق ان في الخليج لو تتخرج تحصل الشهادتين و هني لو تتخرج بس بكالريوس في الطب. مو مهم تروح هني ولا هناك تحصل شهادة طب.
٣- اليونت مثل المديول عندنا الفرق ان ايرلندا يقولون موديول وامريكا يونت و ثنيناهم يعني وحدات دراسية. احنا دراستنا تقسم على ثلاث دورات: جونير و انترميديت و سينيور. في كل دورة في مقررات و كل مقرر عبارة عن سستم للجسم. في جونير ١ و ٢ و ٣. طبعا انا اتحجى عن مدة الدراسة الي خمس سنوات لان اول سنة تمهيدي بس جذي يقولون له ما قبل الطب فمو مهم و كله اشياء ماخذينها في المدرسة. انزين و في انترميديت ١ و ٢ و ٣ و سنيور ١ و ٢. ثاني سنة يعني عقب التمهيدي فيه جونير ١ و ٢ كل واحد منهم عبارة عن فصل دراسي و في كل فصل تاخذ خمس مقررات او اربع و اذا اربع يعني واحد منهم دبل موديول. في الجونير تاخذ محاضرات عن طب ما قبل السريرية (pre-clinical) ومن الانترميديت كل شي كلينيكل. مثلا عندك مقرر عن الجهاز الهضمي في جونير و واحد في انترميديت. الفرق؟ في جونير بس تاخذ تشريح و ريديولوجي و هستولوجي و بايوكمستري و فارماكولوجي و فيسيولوجي و علم النفس و في الانترميديت تاخد باثولوجي و مايكروبيولوجي و طب الكلنكل و جراحة. و في الاثنين يعلمونكم كفاءات سريرية (clinical competencies) بس في جونير بس شلون تاخذ تاريخ الطبي و تفحص المريض و في انترميديت شلون تخيط ناخذ ecg و هل اشياء. عقب ما تخلص جونير ١ تسوي امتحانه و عقب جونير ٢ في امتحان. يعني الامتحانات بس على الي تاخذه في الفصل و هو عبارة عن ١٢ اسبوع دراسي. الصراحة ما عرف عن الخليج بس الي اعرفه ان هناك كل المواد مع بعض يعني ما تاخذون الجهاز الهضمي مرتين بس مرة وفي هاي المرة الوحده تاخذون كل شي من اناتومي لين باثولوجي و مايكرو. وفي الايرلندية في امتحانين منتصف الفصل و نهاية الفصل: مال منتصف ٥٪ و نهائي ٩٥٪. اغلب الناس يركزون في النهائي و ما يعطون اهمية حق ال٥٪ لان ما يسوي شي. النجاح من ٥٠٪ و تفوق درجة ثانية من ٦٠٪ و درجة اولى من ٧٠٪ و الناس الي يحصلون تفوق ١ بس في ال٧٠ و الثمانينات ما تحصل احد اييب ٩٠٪ لان صعب. الmcq في بعض المقررات عليه ٧٠٪ او ٧٥٪ و بس في ٣٠ سوال الا اذا دبل موديول يصير ٤٥ سوال فالسوال عليه ٢-٣٪. و الشورت نوتس ٢٠٪ و بس ثلاثة اسئلة تقريبا كل واحد يسواي ٧٪. و باقي ال٥٪ من ٩٥٪ حق اناتومي و هستولوجي او ساعات الmcq ٥٥٪ او ٦٠٪ يعتمد اذا في في المقرر اناتومي و هستولوجي او بروجكت فيصير mcq اقل من ٧٠٪ بس حده الادنى ٥٥٪ لكن الشورت نوتس ثابت ٢٠٪ و ثلاثة اسئلة بس اذا دبل موديول يصير ٦. اعرف ان في الخليج ٦٠٪ فورماتف و ٤٠٪ سماتف و احنا ٩٠-٩٥٪ سماتف و ٥٪ فورماتف. و النجاح اسهل في الخليج لان ٦٠٪ فورماتف. و في الخليج التفوق من ٩٠٪.
٤- هاي النقطة من اهم النقاط الي لازم تحتطونه في بالكم. الايرلندية جامعة تتبع الاسلوب التقليدي يعني كل يوم تقوم عندك محاضرات و الافرج يكون ٣ محاضرات في جونير و ٤ في الانترميديت. المحاضرات بس من جونير لين انترميديت ٢ و من انترميديت ٣ كله روتيشن و الروتيشن نفسه في اي جامعة طبية مافي فرق. في جونير في كل اسبوع في يوم يا الثلاثاء يا الخميس لازم تروح المختبر حق تشريح و الدكاتره قاعدين هناك من ١٢:٣٠-٤:٣٠. و في كفاءات سريرية بعد كل اسبوع ساعة او سعاتين تتعلم تاخذ تاريخ المريض و تفحصه. في الانترميديت لازم تداومون المستشفي العسكري لان الدكاتره هناك ما يجون الجامعة. يعني تروحون المستشفى من سنة ثالثة الفصل الثاني عقب جونير مباشرةً. و في الانترميديت بس محاضرات في باثو و مايكرو و طب و جراحة و ينزلونكم الواردات في مجموعات كل اسبوع مرة او مرتين حق الكفاءات السريرية. في الخليج مافي وايد محاضرات. و هم يتبعون نظام pbl مثل ما شرح الاخ و مافي نظام احسن من الثاني. الاثنين عبارة عن دراسة الطب بس يختلفون في طريقة الي تحصلون المعلومات. هذا الشي الطالب يقرر شنو يناسبه: هل يناسبك محاضرات و تدرس من البوربوينتات الي يعطونكم الدكاتره او تبي pbl؟
٥ - احنا ندش من سنة ثالثة ومادري عن الخليج. اخوي انت من وين جبت هاي المعلومة في اي سنة انت؟ لان مايصير يخلون طالب سنة اولي يروح المستشفى شبسوي هناك؟ الا اذا يجوف الدكاترة او يعلمونهم شلون يفصون فاوكي.
٦- سيستم الاثنين يعد لامتحان الusmle. تقدم الامتحان عقب سنة رابعة في الجامعتين بس لان احنا يعطونا اناتومي و بايوكم و فارما و هستولوجي و فيزيو و سايكو من سنة ثانية ننسى المعلومات شوي لان في الخليج كل شي ويا بعض مرة وحدة و احنا ناخذ السستم مرتين مرة في جونير و مرة في انترميديت. و في الاثنين لازم تدرس بروحك حق هاي الامتحان و الي يدرس اكثر حقه و يستعد له احسن هو الي يسوي فيه زين. في الخليج امتحان البكالريوس مثل الامتاحان الusmle فالطلبة يدرسون حق البكالريوس جنه يدرسون حق الusmle دراسة حق امتحانين مرة وحدة. احنا في سنة رابعة عندنا روتيشن و دوام في المستشفى من الصبح لين الظهر نرجع و لازم ندرس حق امتحان الusmle لان مافي امتحانات ثانية. بس في الحالتين لادم تدرس للامتحان في الصيف عشان تكون مستعد.
انا ما اقول اي واحد احسن من الثاني هاي انتم تختارون الي يناسبكم. اذا في استفسار ثاني اقدر ارد عليكم و اتمنى من الاخ و طلبة الجامعتين يجون هني و يردون اسئلة الطلبة.
|