المساعد الشخصي الرقمي

مشاهدة النسخة كاملة : ريم وفارس " كاظم ومكية "


MEmO Dalo0o3a
10-07-2009, 11:38 PM
مساء الخير
والإحساس
والطيبة
و الورد والياسمين ... كأني طوولت خخخ
جايبة لكم اليوم قصيدة حلووة تمووت من الضحك .. على إنها طويلة واايد بس حلوة وتستاهل انكم تتابعوونها وتقرووونها ..
كل مرة راح انزل مقطع منها ...
ونبتــديـ ..
كاظم حزيـــن ومستمل ما عنده شغله !
في الحجرة قاعد چنه فاقد أمه واهله
قال ادخل الشات شوي اتهنى واتسله
يمكن احصل رزقي والقى ابنية سهله
دش وكتب نك نيمه ( فارس قلبه تعبان)
واختـار صورة وحطها _ عن يــازعم فنان
يتوهم انــــه صاحـــــــب الصورة وفرحان
ويتخيـــــل انــــه اجمـــل وأحلى لصبيان
ضل يفتــــر الرومــــــات قاعه ورى قاعه
چنه سفيـــــن مضيِّع وطايـــــــر اشراعه
لصبي معزم على شي والخجل بــــاعه
الساتر الله من افكـــــاره في هالساعه
ما شــــاف قـــــــاعة تعجبه كلهم مملين
(قاعة المحبوبين ) ( قـــــــاعة المُحبين )
كل نوع موجود ومهو عــــارف يضل وين !
استغفر الله ناقص ( قـــــــاعة المُصلِّين)
خبرك بعد والشـــــات كله هرار في هرار
ماتدري نـــــاس اصغــــار لو شيَّاب واكبار !
وماتدري نفيه لو ضكر غشَّـــاش وعيَّـــــار
الكل مزيف في الأسامي وفي الأعمـــار
كاظم على الأسمــــــاء ضل يتفحص يشوف
شوق البراري_ رشا_ وردة _ حايرة _ نوف
ريم الفلا _غزلان _ نانسي عجرم _ اطيوف
اسمـــــــــاء حلــــــوة والصور خلتـــه ملهوف
عرَّج على ريــــــــم الفلا في الخاص وسلَّم
هاي .. الصراحة .. ودي نص ساعه نتكــلَّم
ردت عليه بـ هاي .. رد .. صـــورة تتبسَّــــم
قالت: اتفضل .. سكـــــت شويــــــه واتبلعم
قال: الصراحة انا تابعتـــــــش من العـــــــــام
وانتي عجبتيني باسلوبش والعقل هـــــــام
كل كلمة منش في خيـــــالي طبعت اوهام
قلت ادخل الخــــــــاص واشوف آخر الأحلام
طرشت صورة اختصــــــــار ( اخدود حمران)
عن يازعم هي مستحيــــــة من الولهـــــــان
وهو طرش الوردة اختصــــار – تقول هبلان
وسئلته ليش الإسم فـــــارس قلبه تعبان؟
قال الله يلعـن الدنـــيا قبل شيبي بلتــــني
الناس تحسدني بجمـــــــالي وما درتــــني
مهموم وما عندي حبيـــــــــبة قدَّرتـــــــــني
وانتي الصراحـــــــــة نسمة جت وحركتني
استــانست لبنيـــــــه مسكينــــــــــة بكلامه
طارت من اللي يقولـــــــــــه مثلات الحمامه
قالت له افتح قلبــــــــــك وعطني ابتسامه
لا تفتكر واختــــــــــــــك معك ... طار بغرامه
كالعادة ( خيووو ) هذي بس حق البــدايه
تالي ( حبيبي ) و(عمري ) وشوف النـهاية
المهم كــــــــــــاظم ابتشر رافـــــــــع الرايه
بس ينتظر ايميلــــــها وتبــــــــــدي الحكايه
وكالعاده قالت لالا لا ايمـــــيــــــــــــــــــل صعبه
وهو يحلــــــــــف بكل غـــــــــــالي ويقسم بربه
صدقيني ما العب عليـــــش ومــــــــاهي طربة
أول ابنيـــــــــــه انتــــــــــي أكلمها والكعـــــــبه
قبلت وقالــــــــت إنـــــــــت اول شخص اضيفه
قال ادري اصلن من اسلوبش صـــدق شريفه
ومبين انش فــــــــــــاهمة وزينــــــــــه وعفيفة
واطمني فـــــــــايلاتي مضمـــــــــــونه ونظيفة
وانتقلت القصـــــــــــة لصفحـــــــــات المسنجر
وابتدى حب عبــــــــــلة وغــــــــرام البطل عنتر
مغتـــــــرة باسلوبه الحلــــــــــــو وهو بعد مغتر
واليوم بعد اليـــــــــــوم والشلخـــــــــــات تكبـــر
قال: انتي صدق اسمــش الأصلي ريــم يا ريم؟
لو هو مجرد إســــم يعني فقـــــــط نك نيــــــــم؟
قالت: نعم اسمي .. واخواني – كرم – تسنيم
وعندي خت وحده _ رهـــام_ كلنا ننتهي بميم
قــــال: انــــــــا اسمي بعد صدق الأصلي فارس
واخواني .. محمود ولــــــــــؤي واختي (نوارس)
وامي جمـــــــــــــانة والأبـــــــــــــو أحمد الفارس
وكلنــــــــــــــا بَـ مريكا رحنا كملنـــــــــــــا مدارس
انزين ما قلتــــي لي ياريــــــــــــم انتي من وين؟
من قطر لو لكويــــــــت لو ديـــــــــــرتي البحرين؟
قالـــــت من البحريـــــــــن واستــــــــانسو لثنين
عن يازعم فــــــــــن والبـــــــــــلد جمعت القلبين !!
يـــــــــــــتتتبـــع بعد ما اشوف ردوودكــم ..

نبض قلبي
11-07-2009, 01:28 AM
هههههههه كأنها رواية ماتم

وأحلى شي نفية لو ضكر:zzzzzz::zzzzzz:

كملي ..

MEmO Dalo0o3a
11-07-2009, 04:22 PM
شنوووووو هااااااي ؟؟؟ محد رد ما منكم فاايدة على الأقل تشجيع عشان انزل المقطع الثاني ..

الفارس
12-07-2009, 10:30 AM
نزلي المقطع الثاني بس :d

MEmO Dalo0o3a
14-07-2009, 03:16 PM
شوفو حل ليهم صار الصدق


كـــاظــــم مـع الأيــــــام حـــــس الملــل ينــزاح

وريـــم بسوالفـــــــــها بعـــد خلتــــــــه مرتــاح

الضيقــــــة راحــت بالصـــدر وابليـــــس ماراح

بس عسى الضحكة ما تمـــوت وتنتهي اصياح



زاد الوصل والمعـــنويـــات اعتـــلــــت فوق

وصار الحچي كلــه أحاســـيــس وهوى وشوق

( هلا وغلا ) ( من طيب قلبك ) .. لهجـة السوق

وبرب وتيــــت وبــــاك ويـــــلكم .. يسلم الــذوق



بس خبـــــرك الكـَظمي طموحـه بعـــــد أكبـــــــر

ما تكفي هـــــــدرة ورى شاشـــــــات المسنجــر

كل ما عرف شي يبغي يعـرف أكثـــــــر اكثــــــــر

چنــــــــه متخــرع يعنـــي عمــــــــره ما اتبخـــــــر



وهي بعد يدفــــــع البــــــــلا انزهقــــــــت شويـــه

وعقب الخجــــــــــالة اعيونــــهـــــــا صارت قويــــه

چنهــــــا زلاطــــة روب تـــــوهـــــــــا مستويـــــــــه

كل ما روتها القعــــــــده مــــــــاهي مرتــويـــــــــه



زادت الجــــــرأة وكــــــاظم يــــــــذوب بخيـــــــــــاله

عن الشكـل يستفـــــــسر اموجِّـــــــــــه ســـــــؤاله:

وصفي لي شكلش وادري مزيـــــــونــــــــة وغزاله

قالت: اسألنـــــــي واني بوصف لـــــــــك ..( خجاله (


قال: أسمحي لي تـــــــرى ما أهتــــم بالاشكـــــــــال

والناس مــــــاهي بالجمــــــــــال وكثـــــــرة المـــــــال

قالت: أفـــــــا لا تعـــــــتـــــــــذر محشوم ورجَّــــــــــال

اسأل ولا اتحــــــــاتي اظنــــــــــوني ( ماكـــو جنجال )





كاظمو اتدحن الحقو عليه


قال: انتي بيضة مثلي لو حنطية سمرة؟

قالت: يقولون الأهـــــــــل صبغتي شقرة

قال: وقصيـــــــرة لو وسط لو طولي مرَّه؟

قالت: وسط .. لاني زرافـــــة ولاني هُرَّة


استانس الملعوص واتشقــــق بالاوصاف

والبوز واصل للأذون .. اشلــــون لو شاف!

مركب نوايـــــــــاه انطلق والچذبة مجداف

بس جم سؤال الباقي ويوصل الأهـــداف


قال: انتي دفشة شوية لو مثلي رشيقة؟

قالت: شقول لك! تبغي تعــرف الحقيقـــة؟

أكثر بنــــــــات الصف يسموني الأنيقــــــة

بس ما أحب يمدحني شخــص بهالطريقة


إتدحن الكظمي والسانـه چنـــــه مسموت

كل ما سمع منها وصفها قــــال ( بااااموت )

قالت: عليك اسم الله قبـــلك أجرع الموت

رد قال: لا .. واثنينه ان شاء الله في تابوت


والله هبــــــالة ومسخـــرة والله بلاوي

وياما عن النــــت نسمع اسرار وحچاوي

طاعـــون يسري و(الشعر ) يمكن يداوي

وانتظر باقي القصة في عهـــــدة الراوي

شاعرة الهوى
14-07-2009, 03:36 PM
بسم الله الرحمن الرحيم

هاي زماننا :cool:

عجيييب ,,,

BaStaKia
14-07-2009, 04:12 PM
.. ماحب الشعر .. القصصي .. في العربي..وخصوصاً إذا كان بالعامي:smailes57:
بس مشكورة على كل حال ,,:11umbup:

Do0oda
16-07-2009, 04:04 AM
شكرا ننتظر التكمله
عجييبه الصرااحه.. ضروري تكمليها احب هالاشيااء وخصوصا اذا بالعاميه