في جعبتي اسئلة

[الأزهار]

سلام عليكم

مأجورين جميعا

بسألكم كم سؤال في جعبتي, تاريخ كم يبتدي الدوام في كلية العلوم الصحية؟؟

و اذا عطونا مسائي هل نقدر نحول الى صباحي يرضون بدون مشقة لو لازم نركع ليهم ؟ سمعت يقولون ان اذا عندي احد يشتغل في السلمانية التحويل يصير اسهل صح هالكلام لو هرار ؟


التمهيدي يكون بس كورس لو سنة كاملة ؟

دراسة التمريض 4 سنوات هل هذي ضمن التمهيدي بعد محتسبينها لو بدون التمهيدي 4 سنوات؟


مسامحة على كثرة الاسئلة ادري طولت عليكم
اتمنى ألاقي اجوبة :ongue:

[الأزهار]

لهدرجة يعني اسئلتي صعبة و محد لاقي لها جواب !!!:smailes105:

[أبو حوراء]

بسم الله الرحمن الرحيم

اللهم صل على محمد وآل محمد

مرحبا اختي الكريمة وعذرا على التاخر في الرد

الدراسة تبدأ بتاريخ 16-9-2012

وبالنسبة لموضوع التحويل من مسائي الى صباحي موضوع معقد شوي والموافقة ماتكون سهلة ابدا لكن في رأيي لايوجد اي فرق بين الصباحي او المسائي اهم شي الحصول على القبول في الكلية وتالي لكل حادث حديث:sweatdrop:

وعلى فكرة هالسالفة مالها علاقة بوجود شخص قريب يشتغل في السلمانية او ماشابه ذلك...

التمهيدي عبارة عن فصل واحد زيرو كردت -يعني بدون درجات لكن الحضور مهم جدا-،ومجموع الدراسة في الكلية 4سنوات ونص بالتمهيدي.

اتمنى اني اجبت عن كل الاسئلة

موفقين لكل خير...

أبو حوراء....

[الأزهار]

تسلم تسلم تسلم ابو حوراء bounce233

شلون يعني مو سهل التحويل ويش الاجراءات الي لازم اسويها؟ ؟


اني قلت اذا قبلوني الكلية مسائي يمكن افكر اروح الايرلندية بس بعدين برتاح في الدراسة يمكن لكن لين جينا الى الوظيفة بتمرمط لان بتكون الايرلندية وظيفتها في خاص

[الأزهار]

فارس المجد النجدة وينك عن موضوعي :smailes57:

[kh nurse]

تسلم تسلم تسلم ابو حوراء bounce233

شلون يعني مو سهل التحويل ويش الاجراءات الي لازم اسويها؟ ؟


اني قلت اذا قبلوني الكلية مسائي يمكن افكر اروح الايرلندية بس بعدين برتاح في الدراسة يمكن لكن لين جينا الى الوظيفة بتمرمط لان بتكون الايرلندية وظيفتها في خاص

انتي نطري اذا قبلوج مسائي ثبتي القبول وبعدين في وايد بنات ينسحبون يمكن يدخلونج مكانهم

انتي تبع تمكين او الوزارة او تبع الكليه؟

[الأزهار]

جيفه يعني تبع تمكين لو الكلية مافهمت !"سس

عفر مو تبع احد اني :laugh:

[kh nurse]

جيفه يعني تبع تمكين لو الكلية مافهمت !"سس

عفر مو تبع احد اني :laugh:


اذا فليل جنه تبع تمكين

الصبح تبع الكليه

اهمه يحطونج يكتبون في البطاقه عقب

بس بعضهم ايون ويكونون بعثات تبع مستشفيات او تبع الوزارة او تبع تمكين

الي ماعندهم احد يصيرون تبع الكليه

[فارس المجد]

فارس المجد النجدة وينك عن موضوعي :smailes57:

منقطع كم يوم عن المنتدى !

على كل حال ? تستقين الأحداث ؛ انتظري نتايج القبول تالي بتعرفين انتين صباحي لو مسائي ( ا? لين كنتين بعثة ) ... في حالة انه تبين تحولين من مسائي لصباحي يا إنش تجيبين سبب مقنع عشان يحولونش أو يخلونش في قائمة ا?نتظار حالش حال الطلبة اللي ما انقبلوا ولين حصلوا مجال بينقلونش صباحي ولين ما حصلوا بتروح عليش فرصة القبول !!

وبشكل عام الطلاب الجدد يعتقدون انه المسائي شيء شيء جدا ولكنهم ما جربوا الشي عشان يحكمون !وأنا بعد كنت جدي يوم قبلوني مسائي ولكن الحين عندي المسائي أفضل

وشغلة ثانية بما انه احنا بنكون ممرضين ؛ والممرض لين بيشتغل بكون دوامه شفتات فيعني مرة أول لين ومرة آخر لين أو صبح ! فيعني المسائي فرصة انه الواحد يبرمج روحه انه يدرس أو يشتغل في الهوقت مو كل شغله ودراسته صبح !
وسمعت من أحد الأصدقاء بقول انه الدفعة الجديدة ما بكون فيها مسائي والله العالم ( الخبر مو أكيد) وتطبيقه صعب نظرا لصغر مساحة الكلية

والله ولي التوفيق

[الأزهار]

شكرا ع الرد

بالنسبة الى صباحي و مسائي , أني اتوقع قبولي مسائي لان صباحي بكون كله بعثات اعتقد " حسب علمي يعني "

و اذا على التحويل يخلوني انتظار لا يابوي اقعد في مسائي ابرك ليي لان ماعندي سبب مقنع اسبابي مثلها انتون كانت اسبابكم صيث

[فارس المجد]

هدا التفكير الصح ... أنا يوم قبلوني مسائي ما كنت مقتنع بدوام المساىي ولكن كنت أمبي أدرس هالتخصص عاد صباحي لو مسائي وهدحنا مواصلين واتعودنا ولله الحمد

احم احم ... كأني قاعد أصبغ في روحي

[different]

اني لما خلصت المقابله
رحت سألتهم عن عدد الطلبه
اللي بينقبلون تمريض قالت ليي 70 طالب
وسألتها عن تمكين قالت ما في تمكين السنه

بنيه ثانيه سألت قالوا ليها بيقبلون 150 طالب


يعني شنوو الحيييين ؟! :sweatdrop:

[الأزهار]

خيو اسمعيها مني و اكيد طلاب الكلية بيوافقوني على كلامي

كلية العلوم ما ينأخذ منهم لا حق ولا باطل صيث

يوم رحت اسأل عن النتايج قالو لي تاريخ 15/7 :laugh:


بس عادة التمريض يقبلون واججد يوصل العدد الى 100 يعني

[سترآويه كيوت]

إذا الكلية ما ينأخذ منها لا حق ولا بااطل ناااخذ الحق من منو ‏؟من منو نسأل ونستفسر ‏؟

[فارس المجد]

للأسف كلامكم صحيح أن الكلية ما ينأخد منها حق ولا باطل ... لكن مافي هدا شي مو معقول وكلام يحتاج تأكيد من الكلية أقصد مو منكم ، وبالنسبة لعدد طلاب التمريض يكونون حوالي 120 زايد قاصر وعدد 150 معقول بعد أمن لين 70 طالب فأقترح تبديل اسم ( كلية ) بـ (معهد) وطبعا ما أقصدكم بكلامي ...

موفقين

[الأزهار]

اساسا كلما قبلو اكثر كلما زادت فرص القبول للطلبة

اتمنى يقبلون اكبر عدد ممكن خصوصا ان الي مسجلين هالسنة كلش عدد قليل بالنسبة الى اللعام لدرجة ان صار مقابلة وحدة لجميع الطلبة المقبولين في يوم واحد بس !

[saydoo16]

الله يستر ،، أنا حصلت بعثة و خايف ما أنقبل في الكلية ههه ،،

عجل ليش القبول تأخر لهالوقت ؟؟ أكيد بيشخلونا شخااال ،، الله كريم

موفقين جميعا

[الأزهار]

لا تخوفنا رحم الله والديك كفاية الي فينا

هم تأخرو في القبول بس لان يازعم صارو ويا جامعة البحرين و يطلع قبولهم ويا بعض

[شجر الأراك]

السـلام عليكم

في أخبـار تقـول إن نتـائج القبول بتنزل تـاريخ 15 / 8 لأن السنة ويا جامعة البحـرين

موفقــين جميـعـا

[saydoo16]

هههه مو قصدي أخوفكم ،، في الحقيقة انا خايف ..

ان شاء الله يصدقون و تطلع النتايج تاريخ 15

موفقين جميعا :sweatdrop:

[الأزهار]

لا اكيد النتايج تاريخ 15 ماتوقع يتأجل الموعد اكثر بعد ورانه اجراءات ثانية بعد القبول فحص طبي و جنائي و مدري إيش :ph34r:

[بنت البحرين وكلي فخر]

والله انا جفت خبر اعلان جامعة البحرين عن النتايج في مطلع شهر سبتمبر على قناة البحرين اي بما معناها راحت السالفة لي شهر 9 واتصلت في الكلي اليوم وساتهم تقول ويا جامعة البحريمن والكلية تقول بعد هم ما كملو قاعدين يسوون مقابلات حق الطلبة اي حاصلين ع بعثات ....

[الأزهار]

والله يجوز اللعام مرمطو الناس و السنة بعد لا الله لا يقوله ان شاء الله باجر النتايج
و شنو على قناة البحرين هرار معقولة بقولون اسم اسم على قناة البحرين ليش هالكثر فاضين يعني صيث

[الأزهار]

رحت دورت الخبر الي تقولين عنه مو موجود ولا في جريدة !

من وين جايبة الخبر ؟ حطي لينا الوصلة لو سمحتين

[بنت المولاني]

70 طااالب


يا ويييلي !!
>> قووموا نصصصك الكلية !!
و الكووليا اصلن ما تستغني عنن تمكين :sweatdrop:

[بنت المولاني]

والله انا جفت خبر اعلان جامعة البحرين عن النتايج في مطلع شهر سبتمبر على قناة البحرين اي بما معناها راحت السالفة لي شهر 9 واتصلت في الكلي اليوم وساتهم تقول ويا جامعة البحريمن والكلية تقول بعد هم ما كملو قاعدين يسوون مقابلات حق الطلبة اي حاصلين ع بعثات ....




شددددعوة صدددق الكلية باااااردين !! بس ما بخلوونكم لشههر 9
لان فحوووصاتهم يبغى لييها شهر

[بنت البحرين وكلي فخر]

جماعة الخير ان قلت ان الجامعة تقول في شريط الاخبار الي على قناة البحرين تقول الجامعة راح تعلن النتايج في طلع الشهر سبتمبر مو تطلع الاسامي ع قناة البحرين ولا اي شي ثاني والوصلة مادري لاني جفته من التلفزون مو من النت مع تحياتي

[لؤلؤة المحاري]

آني بعد سألت آللي تصير لي هناك قالت بداية 9 أجلوا من 15 /8 إلى بداية 9

جـآري الآنتظظآر:sweatdrop:

[saydoo16]

ألا لعنة الله ،، على الظالمينااا

يااا منتقم