|
ضايعة ضايعة ضايعة .. محتاجة رايكم
السلام عليكم ورحمة الله وبركاته
انا طالبة انهيت المستوى الاول و دشيت المستوى الثاني و اخترت التخصص الادبي ، معدلي 96 فطبعا معظم اهلي و صديقاتي انتقدوني و قالولي انتي غبية لانج عندج هالمعدل و تدشين ادبي .. و طبعا درجاتي في المستوى الاول مرتفعة في المواد العلمية و الادبية ، و انا افهم الريض و الفيز و الكيم و متفوقة فيهم لكن ميولي ادبية و احب الادبي مع اني لو دشيت علمي عادي بتفوق لكن مابي ادش علمي لسببين السبب الاول ان انا ابي ارضي ميولي مابي ادش شي ماحبه ، السبب الثاني انا ابي ادرس اداب انجليزي في الجامعة يعني مو ناوية ادش شي علمي فعشان جذي لازم اكون ادبي .. المهم ، ماحد شجعني ابدا على الادبي بالعكس كل اهلي و رفيجاتي حطمو نفسيتي من كلامهم الجارح بس انا ما اهتميت لكلامهم و قلت ماعلي من كلام الناس اهم شي ادش الي احبه و كنت متحمسة جدا للمدرسة عشان الادبي لكن للاسف اليوم ( الي هو اول يوم لي في السنة الثانية ) تلقيت مئات الصدمات كانها سكاكين في قلبي ، يعني صج صج صج ماتوقعت ابدا ان سمعة الادبي سيئة لهذي الدرجة يعني تخيلو معلمة الانجليزي تدش تقول حظي خايس لاني ادرس ادبي لانكم رمز الفشل و الاهمال و معلمة الريض تقول المقرر ساعتين لكن باييلكم كل يوم عشان اشرحلكم شوي شوي لان اعرف انكم ماتفهمون بسرعة و انا انقهر من هالكلام لاني مو مثل الباقي ، و معلمة العربي تقول اهم شي تييبون 50 في موادكم لانه ادري ماحد يبي يتفوق انتو بس تبون تنجحون ، يعني صج صج كمية كبيرة جدا من الكلام السلبي عن الادبي ، و الصف حتى فعلا انصدمت منه يعني تخيلو نص الصف متسرب و النص الثاني راقدين على طاولاتهم و كلهم معدلاتهم في الستين و السبعين فحسيت اني فعلا قاعدة في المكان الغلط حسيت اني غريبة و ماحد مثلي حتى ما اقدر اكون صداقات يعني شعوري ابدا لا يوصف لدرجة اني كنت شوي و بصيح ، البنات فعلا مهملين و سلوكياتهم مب زينة كلش و المعلمات اذا سألو عن معدلاتنا و اقولهم معدلي يقولونلي شنو يابج عندنا ليش مارحتي علمي او تجاري يعني والله انا مو ذنبي ان الناس شوهو صورة الادبي لان معظم الي يدشونه فاشلين .. ابتديت فعلا احس ان كلام الناس صح و انا الغلط ، القعدة في الصف ثقيلة علي و كرهت المدرسة من اول يوم .. سؤالي الحين هل اغير التخصص ولا ابقى في الادبي ؟؟ اعطوني رايكم تكفون خايفة اندم بعدين سواء بقيت ادبي او حولت علمي او تجاري |
إختي الكريمة، قسم الأدبي مُهمل في أغلب مدارس البحرين من قبل المعلمين والطلبة في نفس الوقت.
واقع لا مًفر منه. والحقيقة الهامة في هذا الموضوع أن البيئة التعليمية تغير من الطالب، مثلاً.. أغلب الطلبة الي يدخلون علمي معدلهم يرتفع بدل ينزل، ليش ؟ مع أن العلمي أصعب من التوحيد ؟ الإجابة تكمن في أن طلبة الصف العلمي أغلبهم مهتمين، وعندهم بيئة دراسية واهتمام متواصل، أول بأول.. يعني مجرد تشوفين طالبة تدرس في الفسحة، له أثر كبير.. طالب العلمي بسرعة يدرك أن الأمور تغيرت، وأنه صار يحتاج يدرس أول بأول، يوم ورا يوم.. مو حزة ماتجي الامتحانات، سلوكه الدراسي ينضبط أكثر. لأنه يعتاد على جو طلبة معدلاتها عالية في المحيط الي حوله. وهذا غائب في صفوف التجاري والأدبي، وتلاقين عندهم العكس، عشان جذي أغلبهم ينجرون للإهمال بسرعة، مع أنهم كانوا في مستوى أعلى بداية المرحلة الثانوية. في المقابل السؤال إلي يطرح نفسه في النهاية، غداً من بيتذكر شنو تخصصتين في الثانوي ؟ محد. بما أنش ذكرتين أن التخصص يتناسب مع ميولش ورغباتش وكذلك طموحش ، ليش تحولين ؟ كل الي ذكرته في الأعلى عوامل جانبية تقدرين تتغلبين عليها، لو كنتين حاسة أنش تحبين المواد الأدبية وممتازة فيها، واصلي.. خصوصاً في الإنجليزي والعربي والاجتماعيات، لأن بيعطونش في أكثر من فصل 8 ساعات إنجليزي.. وفصل من الفصول بيعطونش 3 مقررات اجتماعيات.. أهم شيء لاتخلين موضوع مثل " زملاء " أو " معلمة " تكون عقبة في أنش تختارين التخصص إلي تميلين إليه وتحبينه. |
اذا ناوية تدرسين اداب إنجليزي دشي تجاري احسلج
|
ان شاء الله يكون جوابي زين لش
زين الي سويتيه ودشيتي ادبي على ميولش ورغبتش وحبش ممتاااااااز ومعدلش ممتاز ازيد ما شاء الله اسمعي انا الفصل الاول معدلي في التوحيد معدلي 92 يعني صارت لي بعض المواد الي انا نازل فيها كلش مثل انج 101 وريض 151 بس الحمد لله !! جاء الفصل الثاني جبت معدل 91 استغربت !! شسالفة ليش نقصت المهم انا الان دشيت علمي على طموحي ورغبتي لاني احب العلوم بشتى انواعها والرياضيات يعني وصفي من اول يومين رااااااااائع جدا كل الطلاب معدلاتهم فوق 85 وقليل الي اقل وكل ما دخل علينا استاذ مدحنا واثنى علينا هههههههههههه والله العظيم حسيت نفسي اني في الجامعة خلاص وباجر بتوظف هههههههههههه لذا انا لا افرض رايي عليش ابدا ومطلقا اذا بتواصلي ادبي بكيفش بس تحملين بس انا جيت اقولش ترا العلمي احسن زملاء واحسن سمعة واحسن مستقبل وبسسسسسسس |
ابتديت فعلا احس ان كلام الناس صح و انا الغلط ، القعدة في الصف ثقيلة علي و كرهت المدرسة من اول يوم ..
خلش من الزميلات واصدقاء الدراسه وحاولي تتجاهلين السلبيات لا بد من الصعوبات والمضايقات ولازم نتحمل عشان الأشياء اللي نحبها وإذا على الزميلات والمعلمات وكلامهم السلبي وتصرفاتهم السلبيه والتحبيط والأستنقاص دامش مقتنعه عادي لازم تتحملين وترى يعني السالفة ما بتطول واجد كلها سنتين وبتفارقينهم أو حاولي تكونين ليهم صديقة أو أخت تنصحينهم وتساعدينهم وتشجعينهم وتبينن ليهم أنه الحياه صارات تتطلب منا تعب ومثابره واجتهاد إذا الحين يعانون من كسل من بعد الثانوي ويش بيسوون في حياتهم ؟؟ بيتعودون على الكسل ف يحولون يغيرون من الحين أحسن ليهم ول مستقبلهم يمكن تكونين سبب لتغيرهم بشكل إيجابي من رأي تعطين روحش فرصه أو خبري المشرفه بالوضع على الأقل يعني يحطون حد ل المعلمات عشان ما يقولون ليكم نفس هالكلام ويبتعدون عن التحبيط ونصيحه مني خلاش من كلام الناس اللي لا يودي ولا يجيب واللي لو ويش تسوين ما بيعجبهم العجب وبتتأكدين من هالشي مع مرور السنوات سؤالي الحين هل اغير التخصص ولا ابقى في الادبي ؟؟ اعطوني رايكم تكفون خايفة اندم بعدين سواء بقيت ادبي او حولت علمي او تجاري الشي راجع ليش أنتين واللي تشوفينه وترى إذا على الدراسه الجامعية ولحد الأن في جامعة البحرين يقبلون من 70 وإذا على تخصص أدب أنجليزي فحسب ما أعرف أنه عادي يقبلون خريجين الأدبي والعلمي والتجاري ف ما يفرق واجد شنو تخصصش في الثنوي أهم شي معدل فوق السبعين و يكون اختيارش عن رغبة وحب واقتناع وتكون لغتش الأنجليزيه زينه حسب ما ذكرت وحده من دكاترة التخصص عشان تقدرين تكملين في التخصص |
شكراً لكم جميعاً على كلامكم ..
يزاكم الله خير و يعطيكم العافية |
اقتباس:
صح اللسانك:rose214:::in_love:: |
| الساعة الآن 03:52 AM. |
Powered by vBulletin® © 2024