[محمد الخال]

المشاركة الأصلية كتبت بواسطة مريم مريم مريم مريم

سلام عليكم و رحمة الله و بركاته

عندي اسئلة اتمنى تفيدوني وتفيدون الي يقرا الموضوع

1-فالانج يايبه 95 بس معدلي تراكمي 86،4 وانشالله يرتفع بس سؤالي هل يمكن اني اجتاز سنة التمهيدي بسهولة ولا بصعوبة؟؟؟

2-شنو اسم الاختبار الي بقدمه عشان يطوفوني سنة التمهيدي هل هو الايتلس او التوفل او اختبار القدرات؟

3-و هل استفتدوا شخصيا يالي تدرسون سنة التمهيدي من ناحية طريقة الدراسة في الجامعه والانج بشكل عام؟؟

4-و في احصل نماذج للاختبار الي قدمتوه حق تجتازون سنة التمهيدي عشان اراجع منه وجذي للعلم باني طالبة ثانوي توجيهي واخر سنة لي يعني

5-شنو الاشياء الي لازم اسويها او نصائح اذا عندكم حق اتخطى هالاختبار واطوف سنة التمهيدي واصير دايركت سنة اولى بالكلية

6-واذا نجحت بالاختبار وقدرت اطوف سنة التمهيدي ، بالسنه الاولى بتوهق ان انا بحكم توني متخرجة من الثنوي والجامعة يديده علي وبيئة يديده ومو عارفه اشلون ادرس واشلون ابتدي وشاسوي بوقت المحاضرة هل الشي بيأثر علي يعني او على معدلي لان طوفت سنة التمهيدي!!

وبس سلامتكم وشكرا مقدما للي بتجاوبون على اسئلتي❤❤❤

أنا أشوف شخصياً السنة التمهيدية مضيعة وقت بالنسبة للطلبة اللي مستواهم في اللغة الانجليزية و الرياضيات ممتاز.

بالنسبة للطلبة اللي مستواهم ضعيف واجد فالإنجليزي و الرياضيات فالأفضل ياخذ التمهيدي، و كل ما يجنهد أكثر بيستفيد.

التمهيدي بكون سنة أو فصل.

طبيعة المواد بتكون مقررات انجليزي مقسمة "ريدتنق-رايتنق-لسننيق"، ورياضيات بكون مو ثقيل يعني أساسيات، و برامج الأوفيس "بوربوينت-وورد-اكسل".

أول شي اذا كان التراكمي فوق ال 90 أو الافرج مال الانج فوق 90 تتخطين السنة التمهيدية دايركت.

إذا عندش توفل أو ايلتس بالنسب المحددة قي موقع الجامعة تجتازين التمهيدي.

فرضًا كل هالأشياء مو موجودة عندش راح تقدمون كلكم اختبار القدرات، اختبار القدرات خليط من كل شي و فيه أسئلة تقيس مستوى اللغة الإنجليزية.

- رفعت في المرفقات نموذج من امتحان القدرات.

نصيحتي لا تحاتين الاختبار واجد، فالامتحان مثل ما تجوفين أشياء عامة بس و لا تحتاج أن تعطينها أهمية كبيرة.

بعد في محاولة للتخلص من التمهيدي، في اختبار يسمونه الإعفاء من التمهيدي بيعلنون عنه وي بداية الفصل و على حسب النسبة اللي تجيبينها في الاختبار بيحددون التمهيدي يكون فصل أو سنة كاملة.

و في فرصة بعد ما تلخصين فصل يكون في امتحان إعفاء ثاني و اذا اجتزتينه تدشين للتخصص دايركت.

ساعات يحذفون فصل حسب تقدير الدرجات اللي تحصلينها.

بالنسبة للتوتر من عدم التأقلم وي نظام الجامعة هذا شي طبيعي و الكل مر فيه في بداية المشوار، لكن راح تتعودين بسرعة وي نظام الجامعة.

نظام الجامعة بكون في اختلاف كبير عن نظام الثنوي، خصوصاً من ناحية مستوى الامتحانات و كمية المقررات.

طبعاً الشي المهم أن هالمرحلة بكون فيها الاعتماد على النفس في الدراسة أكثر، لا تخلون أي شي يطوف بدون ما تكونون متأكدين أن فاهمينه، راح يصادفكم دكاترة مختلفين، و كل واحد وليه طريقة تعامل تختلف عن البافي.

طرق المراجعة بتكون مفتوحة حسب احتياج كل شخص.

موجود نماذج للامتحانات و جدي راح تعرفين طريقة الامتحانات لكل مادة.

وبالتوفيق للجميع إن شاء الله..