ضايعة ضايعة ضايعة .. محتاجة رايكم
السلام عليكم ورحمة الله وبركاته
انا طالبة انهيت المستوى الاول و دشيت المستوى الثاني و اخترت التخصص الادبي ، معدلي 96 فطبعا معظم اهلي و صديقاتي انتقدوني و قالولي انتي غبية لانج عندج هالمعدل و تدشين ادبي ..
و طبعا درجاتي في المستوى الاول مرتفعة في المواد العلمية و الادبية ، و انا افهم الريض و الفيز و الكيم و متفوقة فيهم لكن ميولي ادبية و احب الادبي مع اني لو دشيت علمي عادي بتفوق لكن مابي ادش علمي لسببين السبب الاول ان انا ابي ارضي ميولي مابي ادش شي ماحبه ، السبب الثاني انا ابي ادرس اداب انجليزي في الجامعة يعني مو ناوية ادش شي علمي فعشان جذي لازم اكون ادبي ..
المهم ، ماحد شجعني ابدا على الادبي بالعكس كل اهلي و رفيجاتي حطمو نفسيتي من كلامهم الجارح بس انا ما اهتميت لكلامهم و قلت ماعلي من كلام الناس اهم شي ادش الي احبه و كنت متحمسة جدا للمدرسة عشان الادبي لكن للاسف اليوم ( الي هو اول يوم لي في السنة الثانية ) تلقيت مئات الصدمات كانها سكاكين في قلبي ، يعني صج صج صج ماتوقعت ابدا ان سمعة الادبي سيئة لهذي الدرجة يعني تخيلو معلمة الانجليزي تدش تقول حظي خايس لاني ادرس ادبي لانكم رمز الفشل و الاهمال و معلمة الريض تقول المقرر ساعتين لكن باييلكم كل يوم عشان اشرحلكم شوي شوي لان اعرف انكم ماتفهمون بسرعة و انا انقهر من هالكلام لاني مو مثل الباقي ، و معلمة العربي تقول اهم شي تييبون 50 في موادكم لانه ادري ماحد يبي يتفوق انتو بس تبون تنجحون ، يعني صج صج كمية كبيرة جدا من الكلام السلبي عن الادبي ، و الصف حتى فعلا انصدمت منه يعني تخيلو نص الصف متسرب و النص الثاني راقدين على طاولاتهم و كلهم معدلاتهم في الستين و السبعين فحسيت اني فعلا قاعدة في المكان الغلط حسيت اني غريبة و ماحد مثلي حتى ما اقدر اكون صداقات يعني شعوري ابدا لا يوصف لدرجة اني كنت شوي و بصيح ، البنات فعلا مهملين و سلوكياتهم مب زينة كلش و المعلمات اذا سألو عن معدلاتنا و اقولهم معدلي يقولونلي شنو يابج عندنا ليش مارحتي علمي او تجاري يعني والله انا مو ذنبي ان الناس شوهو صورة الادبي لان معظم الي يدشونه فاشلين ..
ابتديت فعلا احس ان كلام الناس صح و انا الغلط ، القعدة في الصف ثقيلة علي و كرهت المدرسة من اول يوم ..
سؤالي الحين هل اغير التخصص ولا ابقى في الادبي ؟؟ اعطوني رايكم تكفون خايفة اندم بعدين سواء بقيت ادبي او حولت علمي او تجاري
|