التسجيل | التعليمـــات | التقويم | البحث | مشاركات اليوم | اجعل كافة الأقسام مقروءة |
28-07-2009, 06:03 PM | رقم المشاركة : ( 1 ) | ||
مدرسة رياضيات
|
برجة بنات الملتقى
السلام عليكم
أنا ما أعرف أكتب تقارير وهرار .. فغشيت من messi المقدمة نشرنا اعلان في المنتدى عن البرجه والقليل من الاعضاء وافقوا بس و لإصرار طالباتي العزيزات حجزنا برجة النخيل اللي في صالة الأنوار ورا نادي باربار يوم الأثنين تاريخ 27 / 7 /2009م وخبرت البنات اللي اعرفهم كلهم يا عن طريق المسنجر أو مسجات على الموبايل الحضور كان عددنا 32 مخلطين بين بنات مدرسة سار وجدحفص وبعض الأهل وطبعا أعضاء المنتدى اللي هم: أم أمير ((الحلوة)) نفحات الجنان همسات روحانية Pure Bored ^&^ZHo0oR^&^ وردة فرح خامنائية الهوى مشروع ممرضه ما أدري هذي من اللي سووا فينا دقة قالوا بجون ولا جو sometimes121 سافرت بدون ما تخبرني MEmO Dalo0o3a كتبت عذرها في الموضوع وبعض الأعضاء اعتذروا لانشغالهم في هاليوم الوصول: أول الواصلين كانوا 4 بنات منهم العضوتان وردة فرح وخامنائية الهوى الساعة 7:30 صباحا دوام مدرسة وبعدهم وصلت أنا وجماعتي الساعة 8:30 على ما سويت الشاي حليب وشريت الريوق وتوافدوا الباقي بعدين الريوق: ما في أحلى من ريوق الهنود اللي هو سمبوسة وجباتي وشاي حليب في هالحر + روتي ويا جبن وقيمة وهذي صورة الريوق عقب ما قضينا عليه من الجوع نسينا نصور قبل الأكل خلصنا ريوق ونزلنا الميدان أقصد البرجه وهذي صورتها طبعا حطينا جم تيوب حق إنقاذ الغرقى عيوبها 1.ربعها طفيح والباقي غزير وثلاثة أرباع الحضور ما يعرفون يسبحون والسباحات الماهرات اللي أنا منهم يتعبون بسرعة 2. مايها ثقيل 3.وفيها كلور وايد تحترق عيونك إذا بطلتها في الماي 4. فيها درج في البداية والدرج اللي في نهاية البرجه خراب مجرد حديدتين للتمويه مما يؤدي إلى أن الوحده عندها 2 أوبشنز يا ترفع روحها غصب وتطلع من الماي يا ترجع المشوار كله عشان تستخدم الدرج مميزاتها: قريبه من منطقة سكن الأغلبية مرافقها زينة لا بأس بها مساحتها (الطول في العرض) ممتازه فيها برجة صغيرة للجهال ( مع إن ما كان ويانا جهال ) الغدى: عشان نريح روحنا من العيوش طلبنا لينا وجبات من ماكدونالدز لأنهم أقرب مكان ويرضون يسوون دليفري بس طبعا سووا فينا دقه وما سألونا وجابوا الأوردر كله أبسايز ودفعنا زياده هذي ورقة الأوردر ويا البيزات (33 دينار) قبل الأكل بعد الأكل اللعب 1.المطابب والتشقلب والرويسي 2.سباق في السباحة بطرق مختلفة 3.لعبنا كرة الطائرة في الماي + كرة السلة بدون مناطط كرة 4.قطينا روبية واللي يطلعها قبل >> بس متنا من الكلور ما يسوى علينا 5.غوص تحت الرجايل 6.أطول نفس تحت الماي 7. صييده الخاتمة الساعة 4 العصر بدينا شوي شوي نطلع من البرجة ونهيئ روحنا للرحيل دفعنا بقية المبلغ ال 50 دينار قفضنا الأغراض وطبعا لأن أم أمير ما تحب تمشي والمكان وصخ اضطرت تنظف المكان وبعدين تطلع ورجعنا بيوتنا مكسرين وتعبانين من اللعب الحمدلله استانسنا وتعرفنا على بعض ومشى الوقت بسرعة وكان بودي عضوات المنتدى يجون بس للأسف ما صار وفي الأخير شكلي وايد هريت ومع السلامة |
||
التعديل الأخير تم بواسطة أم أمير ; 28-07-2009 الساعة 06:07 PM |
|||
مواقع النشر (المفضلة) |
أدوات الموضوع | إبحث في الموضوع |
انواع عرض الموضوع | |
|
|