التسجيل التعليمـــات التقويم البحث مشاركات اليوم اجعل كافة الأقسام مقروءة

  

 


العودة   الملتقى الطلابي > ~~ ملتقى الخريجين و الجامعيين ~~ > ملتقى طلبة الجامعات و المعاهد و الكليات الخاصة > جامعة البحرين الطبية RCSI-MUB

جامعة البحرين الطبية RCSI-MUB كل ما يتعلق بكلية الجراحين الإيرلندية في البحرين

إضافة رد
 
أدوات الموضوع إبحث في الموضوع انواع عرض الموضوع
قديم 20-07-2016, 04:52 PM   رقم المشاركة : ( 1 )
Nawreez
مميز بالفصل الأول 2016-2017

الصورة الرمزية Nawreez

الملف الشخصي

رقــم العضويـــة : 39481
تاريخ التسجيل : 03-03-2012
المشاركـــــــات : 1,186 [+]
الـــــــــــتخصص : طالب جامعي
الـــــــــــجـامعة : RCSI

 اخر مواضيع العضو

Nawreez غير متواجد حالياً

Exll دليلك للجامعة الايرلندية

- الموضوع منقول عن طالبة وياي في الايرلندية .. " ف جزيل الشكر لها على هالمجهود

عادةً أكتفي بالتفرج على ما يُطرح من قِبَل الآخرين و لكني حبيت هالمرة أشارككم بتجربتي في الجامعة كطالبة طب خلصت سنة أولى (فاونديشن) في الكلية الملكية للجراحين..
يوجد عدة مواضيع في هذا القسم من الملتقى عن جامعتنا كتبوها طلاب في الجامعة نفسها واتفق وياهم معظم النقاط اللي انذكرت (بتجوفون أن بحط لنك لما الموضوع يتفق مع النقطة اللي بتكلم عنها) إلا أني حسيت أن نحتاج موضوع محدث أكثر عن الوضع الراهن في الجامعة، بالإضافة إلى العديد العديد من الأسئلة التي توصلني من واجد طلبة متخرجين حبيت تكون الإجابة عنها هني عشان الكل يستفيد.
طرحي للموضوع بكون مقسم عدة أقسام، كل قسم يتناول جانب مهم توصلني عليه أسئلة كثيرة بوضح فيه رايي و الأسئلة التي توصلني – و استفساراتكم طبعاً مرحب بها بعد و ان شاء الله نجوف تفاعل في الموضوع âک؛
القسم الأول: مميزات الجامعة
القسم الثاني: متطلبات التسجيل، المقابلة، القبول، و الاورينتيشن
القسم الثالث: سنة الفاونديشن
القسم الرابع: رأيي و أسئلة متكررة
بسم الله نبدي ..
----------------------------------
القسم الأول: مميزات الجامعة
1) المرافق:-
فيها واجد مرافق يرتادها الطلبة باستمرار. بالنسبة لي أهمها المكتبة Learning Resource Centre أو اختصاراً LRC – مكان هادئ جداً (إلا في بعض الأحيان) و خياري الأول في المراجعة، فيها معظم الكتب اللي ينصحون بهم الدكاترة في المحاضرات، و فيها ست غرف زجاجية صغيرة Study rooms و ممكن استخدامهم لعدد محدد من الأفراد (سواء لاجتماعات أو لدراسة) و هذلين تحجزونهم اونلاين، بالإضافة إلى أن المكتبة فيها مطبخ صغير تقدرون تستخدمونه. السلبية الوحيدة بالنسبة للمكتبة أنها مو عودة واجد يعني فترة الامتحانات من الصعب تحصل طاولة و كرسي هذا عدا عن التجمعات اللي تصير عند طاولة أي أحد للنقاش و اسمعوا عاد التبسبس و الوشوشة . بس عموماً مكاني المفضل خصوصاً صباحات الخميس، و هي مفتوحة جميع أيام الأسبوع تقريباً –حتى الويكند- و لوقت متأخر.
مكان ثاني مهم عند الطلبة بس مو عندي Centre for Student Success أو اختصاراً CSS. كان اسمه شي ثاني و هذا الاسم الجديد، و هو عبارة عن مكتبة مصغرّة في الطابق الرابع و هذا بخلاف المكتبة عادي فيه الأكل و الكلام بصوت، و فيه Tutors يقدرون يساعدونكم إذا تواجهكم أي مشكلة سواءً أكاديمية في الجامعة، أو عائلية، بالإضافة إلى أنهم يرتبون Sessions مثل الحصص الإضافية كلما أخذنا موضوع يستصعبونه الطلبة في المحاضرات الأساسية. مثلاً إذا كانت محاضرات الأسبوع عن جهاز معين في جسم الإنسان أو محاضرات كمستري تحت موضوع واحد يبي ليه شغل يقومون يطرشون لنا موعد الحصة الإضافية –عادة تكون بعد انتهاء المحاضرات- و الشي الحليو فيها أن المس تستشيرنا في الطريقة اللي نبيها في توضيح الموضوع: هل تشرحه من البداية؟ هل تناقش أسئلة امتحانات سابقة؟ هل في نقطة معينة تحتاج توضيح؟ نبي ملخص للسالفة؟...الخ. شخصياً قمت أروحها الفصل الثاني – مو كلها و لكن كل اللي رحتهم كانوا جداً مفيدين و طلعت منهم بشي زيادة. للتوضيح فقط هذلين غير عن التتوريال Tutorial اللي بشرح سالفته عقب و لكن النقطة أن التتوريال عليه حضور إجباري أما هذي لا.
محبي الرياضة المرفق التالي لكم: اسمه Sports & Recreation Centre أو اختصاراً SRC (لاحظوا حب جامعتنا للاختصارات أخذت فترة على ما تعودت أقولهم بدون تفكير عميق). المهم، الـSRC مبنى منفصل عن المبنى الرئيسي للجامعة و فيه ملعب كرة سلة (و هذا نفس المكان اللي نمتحن فيه و أول مكان دخلناه يوم الاورينتيشن، سيأتي تفصيل هذا لاحقاً)، و فوق في جم للشباب و آخر للسيدات و واحد مختلط، بالإضافة إلى Gloria Jeans. ينظمون فعاليات واجد بعد، و يذبحونا بالإيميلات اللي فيها جداولهم الأسبوعية و خططهم اللي ما تخلص. شخصياً ما كان لي خص بالجانب الرياضي فما أقدر أنقل خبرتي في هذا الجانب، و لكن الشباب كانوا و لازالوا في الإجازة يستخدمون الجم و يروحون حصص اليوغا، و الزومبا، و الايروبكس و غيرها و غيرها من المباريات و كلهم عاجبنهم الوضع طبعاً. فيه ملعب كرة قدم توهم فاتحينه السنة للاستخدام.
بالنسبة إلى قاعات المحاضرات في ثلاث – كلهم واسعين و حليوين ثنتين في الطابق الأول و وحدة في الطابق الرابع. و عدنا خمسة لابات و خلال فاونديشن كنا نستخدم واحد ألا و هو Lab 5 في الطابق الثاني، و لكن سمحت لي الفرصة مع عدد قليل من الطلبة أن نستخدم الـResearch Lab أو Lab 1 و هو مكان مقدس بالنسبة للدكاترة لأنه المكان اللي يسوون فيه بحوثهم حتى أن عليه رقم سري و ممنوع أحد يدخله إلا اللي عندهم بحث يشتغلون عليه بإشراف دكتور المادة. مكان جداً جميل و إذا تحسون روحكم جادين و فيكم شدة بحث من أول سنة اغتنموا الفرصة.
طبعاً يوجد مطعم في الطابق الثالث اسمه St Steven Restaurant أسعاره مناسبة و أكله لا بأس به، وفي طلبة يطلبون من بره و يأكلون فيه جداً عادي.
فيه عدنا مكتب للطباعة Print Office و تقدرون تسوون لكم اكاونت تحطون فيه مبلغ معين عشان تقدرون تطبعون دايركت من أي مكان في الجامعة و تروحون تستلمون الأوراق – هذا حسيته مفيد لأني من النوع اللي ما أحب أكون قبال اللابتوب طول الوقت أدرس منه فكنت أطبع المحاضرات بسعر جداً رمزي ما أتوقع فيه مثله في السوق.
سؤال تكرر عليي أكثر من مرة: عندكم لوكرات؟ للأسف ما عدنا و مادري ليش
الأخ Dr.rcsi كتب شي مشابه للي كتبته عن المرافق في موضوعه و هذا اللنك
https://students-bh.com/vb/showthread.php?t=71430

2) الدكاترة:-
كلهم كانوا زينين و طيبين و بابهم مفتوح للجميع و في أي وقت – يعني عندك شي مو فاهمنه في المحاضرة تقدر تروح ليه المكتب و يشرح لك، و إذا ما تبي تروح تقدر تطرش إيميل و الرد –عادةً- يجي بسرعة. الحليو فيهم (و أتكلم عن اللي تعاملت وياهم في فاونديشن) أن يسمعون الكل و يجون المحاضرة اللي عقب أو في التتوريال يناقشون المواضيع التي تهمنا كطلبة سواء كانت تخص المحاضرات أو أكاديمياً بشكل عام.
من ناحية الشرح في ناس أحسن من غيرها يعني في دكتور بعاملك كواحد توك متخرج من ثانوي و براعيك و هو يشرح و بفصل كل نقطة، و في ثاني بيشرح شرح دكاترة يعطي الفكرة الأساسية و يتكلم عن الموضوع بشكل عام و يطلب منك أنت تروح تبحث و تقرأ بطريقة تساند اللي تعلمته. ما أقدر أقول أني أفضل واحد على الآخر، لأن كل واحد عنده وجهة نظره و لكني أقول أن احنا كبرنا و لازم نكون مستعدين لأي شيء يواجهنا و الدراسة في الجامعة تتطلب منك جهد إضافي عشان تتفوق و تتميز في المادة.
3) نوادي و مؤسسات Clubs & Societies :-
هذلين مسوينهم الطلبة إلى الطلبة – نوادي لكل شيء ممكن يخطر على بالكم و يسوون فعاليات بعد. فكرة جميلة إذا تحسون عندكم وقت. ارجعوا إلى موضوع الأخ DR.RCSI للمزيد.
4) الفعاليات:-
منها مال الطقطقة و الوناسة و منها المؤتمرات و الفعاليات الطبية (هذلين تحصلون عليهم شهادات مشاركة و جداً جداً مفيدين و الحليو فيهم انه ببلاش أو بأسعار رمزية). بالنسبة لفعاليات الوناسة ما حضرت و لا وحدة ما عدا فعالية الكرسمس لأني كنت موجودة أدرس في الجامعة و طليت عليهم .. الفعاليات هذي يحضرها عدد كبير جداً جداً من الطلبة لأنها رخيصة و فيها أنشطة. عادةً تكون في الليل يوم الخميس ليلة الجمعة و يسوون لها إعلانات كبيرة.
في ختام قسمنا الأول أحب أذكر بعض النقاط المتعلقة بما ذكرته سابقاً: الجامعة تهتم جداً بالطالب و نفسيته و تحاول تساعده – يعني مثل ما جفتون جميع المرافق الموجودة، الدكاترة و الستاف عموماً، و حتى الأنشطة و الفعاليات كلها تهدف إلى شيء واحد و هو تنمية الطالب سواء عقلياً، نفسياً أو جسدياً. بالمقابل هم يطالبونك تنجح و تطمح للأفضل – نصيحتي لكل الخريجين اللي بدشون جامعتنا أو غيرها: استغلوا كل فرصة و كل الأشياء الموفرة ليكم لأن اليوم هي في أيدكم باجر يمكن لا و سووا منها شيء عظيم لأنكم تقدرون.
---------------------
القسم الثاني: متطلبات التسجيل، المقابلة، و القبول
سأتناول هذا القسم مع أن العديد من المواضيع تناولته، و لكن عشان يكون عدنا موضوع متكامل. تقدرون ترجعون إلى موضوع الأخ MJA لأسئلة المقابلة و استفسارات أخرى بعد https://students-bh.com/vb/showthread.php?t=24640

1) التسجيل:-
هذا يكون اونلاين و التسجيل للسنة الأكاديمية 2016-2017 مفتوح حالياً حتى تكتمل المقاعد. الطريقة سهلة جداً و ما يبي ليها: تسوي اكاونت تسجل فيه المعلومات اللي طالبينها و تحمل شهاداتك، نسخة من الجواز، نسخة من البطاقة السكانية، نسخة من شهادة الـIELTS، و الـPersonal statement على شكل مرفقات. المرفق الأخير تكتب فيه عن نفسك، ليش اخترت الطب، أهم إنجازاتك.. الخ يعني مثل الـCV بس فقرات و سمعت أن يكفي صفحة وحدة بس اني سويته على الطريقة اللي يطلبونها UCAS. ما عليكم مني و لا منهم سووا شي بسيط و توقعوا يسألونكم في المقابلة أسئلة بناءً على اللي كتبتونه.
تقدرون بعد تسوون حفظ حق اللي سويتونه و ترجعون تكملون بعدين. بعد الانتهاء بيطلب منكم مبلغ و قدره $100 و هو ما يعادل حوالي 37.5 دينار بحريني و يزيد أو يقل على حسب قيمة الدولار، و يمكن الشركة Visa or MasterCard تاخذ فائدة على التحويل من دولار إلى دينار. المهم بعد ما تخلصون بوصلكم ايميل أن تم تسجيلكم و بيتواصلون وياكم قريباً بشأن المقابلة إذا طلعتون مستوفيين للشروط.
هذا موقع الجامعة للتسجيل: http://rcsi-mub.com/index.jsp?p=103&n=1115

2) المقابلة:-
بطرشون ايميل فيه اليوم التاريخ و الوقت و المطلوب منكم تردون عليهم بايميل هل يناسبكم و بتحضرون أو تبون يوم ثاني حق تكونون من ضمن قائمة المدرجة أسمائهم في يوم المقابلة.
أذكر اللعام مقابلتي كانت الصبح في رمضان نص شهر سبعة – اللي يسوون المقابلة دكاترة، بتدشون غرفة واسعة فيها أكثر من مقابلة في نفس الوقت، قعد ويايي دكتور واحد و كان الموضوع جداً سلس أخذنا تقريباً 15-20 دقيقة سألني فيها أسئلة واجد بعضها لها علاقة بالتخصص و معظمها لا، سألني بشكل خاص عن الـPersonal statement و أبدى إعجاب فيها (فيعني تقدرون تتركون انطباع قبل المقابلة من خلالها)، قال ليي ذكرتين كذا و كذا اشرحي ليي أكثر عن التجربة، سألني بعد عن رؤيتي للأشياء و فلسفتي في بعض الأمور، و من خلال إجاباتي كانت تطلع أسئلة أكثر.
نصيحتي: لا تخافون الجو جداً مريح وياهم و كل اللي يطلعون يقولون نفس الشي. الهدف من المقابلة أنهم يعرفون مدى ثقتك بنفسك أكثر من قياس لمستوى اللغة الإنجليزية، و تذكروا: قدامهم شهادة الـIELTS و يعرفون مستواكم في الـSpeaking فيعني تعاملوا ويا الموضوع بسلاسة و أريحية و بالتوفيق للجميع.
في نهاية المقابلة بقولون لكم إذا انتون عندكم أسئلة لهم و اني سألت ان جم بياخذون وقت على ما يردون عليي و قال أن الموضوع ياخذ 10 أيام إلى أسبوعين. شخصياً وصلني ايميل عقب يومين من المقابلة (كانت الثلاثاء و الخميس وصلني ايميل فيه الاوفر مالي ألا و هو برنامج ست سنوات أو اللي نسميه فاونديشن)، و في مهلة أسبوعين لدفع مبلغ و قدره $39500، ما يعادل حوالي 15000 دينار بحريني بس يعتمد ساعات أكثر أو أقل حسب قيمة الدولار و الشركات مثل ما قلت مسبقاً.
سؤال تكرر عليي: بالنسبة للدفع هل ندفع المبلغ كامل أو على دفعات خلال السنة؟ المعروف أن أول سنة يجب دفع المبلغ كاملاً في الصيف لأنك مستجد، و لكن السنوات اللي عقب (يعني مثل الحين) تدفع نص المبلغ في الصيف قبل نهاية شهر 8 و النص الباقي الكورس الثاني قبل نهاية شهر 1 و طبعاً ما بقولون لا لو حابين تدفعون المبلغ كامل في الصيف.
إذا عندكم أي استفسارات أخرى بالنسبة للرسوم و الدفع ممكن تطرشون لهم ايميل أو تراجعون مكتب الرسوم Fees Office في الطابق الثاني. هذا ايميلهم: [email protected]
3) القبول:-
هني بجاوب عن سؤال الجميع: شلون و على أي أساس انقبل في برنامج دون الثاني؟ و للتوضيح بنبدأ بذكر البرامج.
• أول برنامج Medical Commencement Programme أو اختصاراً MCP هذا برنامج سبع سنوات. ما أعرف عنه الكثير و لكن بفيدكم باللي أعرفه: حاله حال سنة بالمدرسة تتناولون فيه مواضيع العلوم الفيزياء الكيمياء و الأحياء، يقعدون الطلبة في صف و اللي يعلمونهم مو دكاترة و إنما Tutors متخصصين في مادة أو أكثر من مادة، و طريقة امتحاناتهم غير عنا احنا في فاونديشن.
• ثاني برنامج Foundation Year و اختصاراً FY هذا برنامج ست سنوات و بتكلم عنه بالتفصيل في القسم الثالث من موضوعنا بس هني المعلومات اللي ناخذها More advanced و تهيئة إلى سنة JC1/JC2.
• ثالث برنامج Direct entry نسميه يعني الطالب بدش برنامج طب بحت من أول سنة، و هذا البرنامج مدته خمس سنوات و أول سنة فيه JC1/JC2 – هذا اسمها.
لاحظوا أن طلبة سبع سنوات بياخذون فاونديشن سنة ثانية و JC سنة ثالثة، بينما طلبة ست سنوات بكون عندهم فاونديشن سنة أولى و JC سنة ثانية.
تقدرون تقرون أكثر عن البرامج في موقع الجامعة و لو أني أحس أن يبي ليه تحديث شوي: http://rcsi-mub.com/


نرجع لسؤالنا المهم و هو على أي أساس؟ الأساس الدرجات و مستوى اللغة الإنجليزية و هل أنت خريج مدرسة حكومية أو مدرسة خاصة، و إذا كنت خريج مدرسة خاصة ما نوع الشهادة التي تحملها. خلنا نفصل هني.
أولاً طلبة المدارس الحكومية: عندكم خيارين يا أما تصيرون سبع سنوات، أو ست سنوات أما دايركت انتري ما يصير. ليش عاد (و أدري الكل عنده اعتراض على الشي)؟ اني بعد كنت أقول ليش بس صدقوني أحسن لأن احنا مو متعودين ناخذ المواد العلمية بالانجليزي و حتى لو درجة الـIELTS مرتفعة ترى ماليها دخل لأنها تقيس مستوى اللغة بشكل عام أما المصطلحات العلمية لا وعدنا كم هائل و تحتاجون فترة على ما تاخذون على الوضع.
انزين على أي أساس أصير ست أو سبع؟ هني تدخل درجات المدرسة و المعدل في الموضوع و الـIELTS بعد. هل في درجة محددة لازم أحصلها في الايلتس و لا شسالفة؟ مثل ما قلنا مو بس الايلتس يلعب دور حتى المعدل و الدرجات يعني درجة عالية في الايلتس، و المواد العلمية (فيز، كيم، حيا) و الريض فيه شوي تقصير بالإضافة إلى معدل مو واجد فوق بتدش سبع سنوات. أما إذا كان المعدل عالي (و ان شاء الله كلكم معدلاتكم عالية)، و الايلتس درجة زينة تدشون ست سنوات.
عقب في فاونديشن في مادة يقسمونكم فيها حسب درجات الايلتس (يعني لاحقنكم وين ما رحتون) و هذي بنفصلها في القسم الثالث.
ثانياً طلبة المدارس الخاصة: يصير يدشون أي البرامج الثلاث حسب شهادتهم و درجة الـIELTS. كل مدرسة خاصة تختلف في نوع الشهادة اللي يحملها الخريج و بعض المدارس عندها أكثر من نوع من الشهادات. ما أعرف شنو الفرق بين كل وحدة و الثانية و لكن عدنا International Baccalaureate (IB)، A levels، و American diploma، و يمكن في غير بعد و اني ماعرفهم.
المهم أن في درجة معينة مطلوبة من الجامعة عشان تدشون برنامج خمس سنوات دايركت يعني ما يكفي أنك تحمل شهادة IB مثلاً عشان تدش (الدرجة مهمة). إذا كانت الدرجة أقل من المطلوب فأكثر طلبة المدارس الخاصة يتأهلون يدخلون برنامج ست سنوات –بس بعد مثل ما قلنا مو شرط. أعرف اثنين تخرجوا من نفس المدرسة و في نفس الدفعة – واحد دخل برنامج خمس سنوات، الثاني سبع سنوات و اني ست سنوات (مادري شدخلني بس أقول).
في طلبة مدارس خاصة يحصلون خمس سنوات بس يطلبون أن يدشون ست – هذا الشي مسموح به في الجامعة – و أعرف ناس سووها. ليش؟ لأن لا تفكرون أن برنامج الخمس سهل على تبع المدارس الخاصة – حتى هم يستصعبونه – و لذلك يستفيدون من تجارب غيرهم اللي أكبر منهم و سمعت من وحدة أن "مال الحكومة اللي يدشون فاونديشن يصيرون أحسن منا عقب لما تكون هي سنتهم الثانية و احنا سنتنا الأولى، و لذلك نصحت أختي اللي انقبلت في خمس أن تدش ست". طبعاً مو شرط قالت أحسن يعني اتفق وياها بس أنقل لكم خبرتي في المجال و لكم حرية التفكير في الشي.
طبعاً الاوفر اللي بوصلكم مكتوب فيه البرنامج اللي حطوكم فيه و مهلة الدفع و كل المعلومات اللي تحتاجونها، و إذا عندكم أي استفسار ثاني بعد تقدرون تراجعونهم في الجامعة أو تتصلون حق الادمشن أو تطرشون إيميل و هذا إيميلهم: [email protected]
4) الاورينتيشن:-
بعد ما تدفعون كامل و كلشي بطرشون لكم إيميل تأكيد على الدفع و ما يظل عليكم سوى انتظار إيميل ثاني فيه دعوة ليومين أورينتيشن –اللعام كان يومين- و ما أدري إذا السنة غير.
طبعاً مرحب بأولياء الأمور و في لهم برنامج تعريفي بالجامعة في نفس اليوم، و لكن انتون بياخذونكم إلى ملعب كرة السلة في الـSRC و نفس الشي بسوون لكم برنامج تعريفي بالجامعة، و بعد ما يخلصون بنادونكم بالأسماء عشان يكوّنون مجموعات صغيرة كل مجموعة عليها طالب أكبر منكم بسنة و نسميه Buddy. هذا شغلته يراويكم الجامعة، يجاوب عن استفساراتكم، بصيرعندكم قروب على الواتساب و تقدرون تسألونه اللي تبونه طول السنة – الهدف من البرنامج أن يخلون الطلبة الجدد مرتاحين أكثر و أن يسمعون تجارب الطلبة اللي كانوا في يوم من الأيام في نفس مكانهم و الصراحة أني استفدت من الإنسانة اللي كانت مسؤولة علينا و لحين عندي تواصل إياها.
في نفس يوم الاورينتيشن بجيكون وياكم أوراقكم، فحوصاتكم الطبية، بصورونكم حق الـStudent ID (فيعني أخذوا بالكم و احتاطوا لأن الصورة بتظل وياكم على طول)، و بعد بيعطونكم اللابتوبات و الجهاز عبارة عن MacBook Air و لا بأس به من وجهة نظري.
خلصنا هالقسم الطويل ! إذا في شي ما انذكر ذكروني و ان شاء الله ما يصير خاطركم الا طيب.

القسم الثالث: سنة الفاونديشن FY
و هي مثل ما قلت السنة الأولى في برنامج الست سنوات – سنة جميلة و غير عن تجاربكم في المدرسة و لو أن بعض المواضيع و خصوصاً اللي تناولتها في الفصل الأول مقاربة حق اللي ياخذونه طلبة العلمي في المدارس الحكومية مع بعض الإضافات و التفصيل ( و ساعات ما في إضافات و لا تفصيل بعد بس الفكرة بشكل عام). واجد طلبة يستخفون بها، و لكن في الحقيقة هي مرحلة مو بالسهولة اللي الواحد يتخيلها و يبا ليها شغل و شغل من الزين بعد – مو قصدي أخوف أحد لكن يجب أن تكونوا على قدر عالي من المسؤولية و الجدية عشان تقدرون تعدونها. سمعت إنها كانت أسهل في السنوات اللي قبل و أنهم الحين قاعدين يصعبونها أكثر (و هذا كلام دكاترة لا طلبة و لا غيرهم) لأن يبون يتأكدون من يصلح فعلاُ و يقدر يتحمل الضغط و من لا. نتيجة الاستخفاف بأي شيء في الدنيا هو الفشل و نتيجته في جامعتنا الرسوب و لا تقولون الخمسين سهلة و تنجاب لا هذي بعد يبي لها شغل ما بال إذا كنتون ناوين تجيبون تفوق؟ الموضوع كله مقياس لمدى حبكم و تمسكم بالتخصص، و إلا فالمكان غير مناسب لكم.
الأخ MJA كتب في أحد مواضيعه عن هالمرحلة و تقدرون تجوفونه هني
https://students-bh.com/vb/showthread.php?t=71946

كل المواد فيها محاضرات أساسية و تتوريالات ما عدا مادتين هما Module 6 و Module 8 بتكلم عنهم أكثر بعد شوي. المحاضرات و التتوريالات عليهم حضور إجباري و أي تقصير في الحضور قد يؤدي إلى حرمان من الامتحان النهائي و الحرمان من النهائي معناه رسوب دايركت لأن النهائي عليه 90% من الدرجة النهائية اللي بتحصلها في المادة – واجد يحطون بالهم على الحضور و هو شي زين بالنسبة ليي: لو لا سمح الله رحتون المستشفى و خيروكم بين دكتورين و قالوا لكم قبل لا تدشون أن واحد كان ما يحضر محاضراته و الثاني كان يحضر أي واحد بتختارون؟
المحاضرات عبارة عن PowerPoint Presentations تقدرون تنزلونهم قبل المحاضرة من خلال الموقع اللي نسميه Virtual Learning Environment أو الـVLE. هذا الموقع فيه كل الأشياء اللي تحتاجونها، مرتب و مقسم بحيث أن كل مادة تحتها مرفقاتها و ملفاتها – بقولون لكم عنه أكثر و بعلمونكم شلون تستخدمونه بعد.
التتوريال يكون مثل حصة التقوية على موضوع تناولتونه خلال الأسبوع – بتناقشون ثلاث أو أربع محاضرات يا عن طريق حل أسئلة، أو نقاش عادي من خلال أسئلتكم، و ممكن الدكتور يوضح نقطة غير مفهومة أو فيها لبس. المهم أنكم تدشون التتوريال دارسين المحاضرات المتعلقة به و حبذا لو تحطون لكم ورقة صغيرة فيها الأشياء اللي مو فاهمنيها عشان تقدرون تسألونها فتستفيدون و يستفيدون الباقي بعد. استغلوا التتوريال فهو المكان اللي تقدرون فيه أن تتوسعون ويا الدكتور في النقاش، و تتدربون على طريقة الامتحانات. ساعات أحس التتوريال مفيد أكثر من المحاضرة نفسها – مو تشجيع على عدم حضور المحاضرة بس لتوضيح أهميته فلا تستخفون فيه و احضروا.
للتوضيح فقط: المحاضرات مدتها 50 دقيقة إلى ساعة و تكون في القاعات الكبيرة و المفروض تحضرها الدفعة كامل، أما التتوريال فمدته ساعة و نص إلى ساعتين و يكون في غرف صغيرة و تكونون في مجموعات صغيرة، بقولون لكم انتون في أي مجموعة بداية السنة.
بالنسبة للامتحانات فيوجد امتحانين في الكورس و نوعين من الأسئلة لا غير:
• الأول امتحان الـFormative و الأسئلة عبارة عن اختيار من متعدد Multiple Choice Questions أو MCQs اختصاراً. هذا عليه 10% من المادة. طلبة واجد يطنشونه بحجة أن ما يسوى و يركزون بس على الفاينل، و لكن شخصياً أنصح تدرسونه عدل عدل لسببين: الأول أنه عقب بتسهل عليكم دراسة الفاينل خصوصاً أن الكمية لا يُستهان بها، و السبب الثاني – وهو الأهم- أن معظم الطلبة اللي يرسبون في المادة تكون ناقصتنهم بس درجة أو درجتين عشان ينجحون و يلاحظون أنه عندهم تقصير في الفورماتيف يعني لو هم سووا زين جان نجحوا. هذا كلام الجامعة بناءً على الإحصائيات و الدراسات اللي يسووونها على أداء الطلبة و مستواهم.
• الثاني امتحان الـSummative و هو النهائي أو الفاينل و هذا عليه مثل ما قلنا 90% من المادة. فيه نوعين من الأسئلة: اختيار من متعدد MCQs و أسئلة كتابة Short Notes Questions او SNQs. مدة الامتحان كامل ساعة و أربعين دقيقة يعطونكم ورقتين: ورقة الاختياري و مدتها ساعة، تخلصون يسحبونها يعطونكم ورقة الكتابة و مدتها أربعين دقيقة. الاختياري عليه 40% فيه أربعين سؤال تحلونهم و تنقلون الإجابة في ورقة إجابة (يعني مثل الايلتس)، و الكتابة عليها 50% فيه خمسة أسئلة تجاوبون عليهم في الورقة نفسها –كل سؤال ثمان دقايق. عندهم طريقة تصحيح معينة توها مطبقة السنة بعلمونكم إياها و ما بوصل نهاية الكورس الا و انتون عارفين طلعتكم من الامتحان جم بتجيبون بالضبط. نصيحتي: الامتحان فرصتك لإثبات نفسك و كل اللي تعلمته خلال الفصل – اظهر لهم تميزك من خلال إجاباتك.

سؤال يتكرر عليي: شلون سستم المعدل؟ احنا ما عدنا معدل من أربعة مثل باقي الجامعات. يكون من 100% و هو متوسط درجات الفصلين و في تقدير يعني أكثر من 70 تفوق First Honour or H1. من الجدير بالذكر أن معدل فاونديشن مو محسوب ضمن معدل السنوات اللي عقب – تذكروا أن تبع الخمس سنوات ما ياخذون فاونديشن و لذلك حسبة المعدل تبدأ من سنة ثانية و هذي لحد الحين ماعرفها و لا تطرقت ليها ويا أحد.
الحين نتطرق للمواد أو الـModules، كل وحدة تتطلب جهد، و دراسة، و مسؤولية، و جدية. بعضها تنأخذ في فصل واحد و بعضها يمتد على الكورسين:
M1: Introduction to Medical Physics
هذي أخذناها الفصل الأول، مادة جداً جميلة و ممتعة و الدكاترة اثنينهم كانوا زينين. بالنسبة ليي كانت أسهل مادة في السنة كامل، حتى أسهل من الكيمياء اللي كان تخصصي و أعتز فيه.
M2: Medicinal and Pharmaceutical Chemistry I
هذي بعد أخذناها في الفصل الأول. مادة حليوة و خفيفة لأن المواضيع اللي فيها متكررة و ماخذينها في ثانوي – كمية كبيرة منها تتناول كتاب كيم 211 اللي أخذناه الفصل الثالث كلنا اللي كنا مسار علمي، و في شوي محاضرات من كيم توجيهي آخر فصل مال وزن المعادلات و الخلايا الجلفانية..الخ نسيت رمزه ، و في جزئية بعد من كيم 214 الفصل الرابع (هذي أحلى شي كانت عندي بس يبي لها تركيز)، و آخر جزئية من المادة مقدمة في الكيمياء العضوية مشابهة للي أخذناه في كيم 315 بس فيها إضافات و أشياء جديدة. هذي أهم جزئية في المادة كامل لأنها الأساس حق M9 و هي المادة اللي بتاخذونها الفصل الثاني – لازم تحطون بالكم زين لأن العضوية هي الأكثر ارتباط بتخصصنا الطب.
M3: Introduction to Human Biology
مادة في الفصل الأول بس، شبيهة جداً بحيا 316 تبع الخلية و الوراثة و الجينات. أدري المقرر الكريه اللي الكل يستصعبه بس اكتشفت أن الموضوع أسهل و أمتع بالانجليزي. في فيديوات لا تعد و لا تحصى على اليوتيوب تساند هالمادة.
M4: Human Systems I
هذي مادة أخذناها على الفصلين – من الاسم تتناول جسم الإنسان و الأجهزة اللي فيه. الشي الحليو فيها وفي المادة اللي عقبها بعد أن ما تقتصر بس على الأحياء مثل ما يمكن تفكرون و إنما في محاضرات بجي يشرحها دكتور الفيزياء و الكيمياء بعد. يعني مثلاً لما اتكلمنا عن العين شرح دكتور الأحياء الأجزاء و أهميتها و وظائفها، دكتور الفيزياء الأشياء المتعلقة بمادته، و دكتور الكيمياء العمليات الكيميائية اللي تتم داخل العين و تخلينا نقدر نجوف فيعني عقب ثلاث أربع محاضرات عن موضوع معين يكون عدنا تصور كامل عن شنو صاير. عموماً محتوى المحاضرات مقدمة حق أشياء واجد بنتوسع فيها أكثر في سنة ثانية يعني في جزئيات histology/physiology/embryology الخ. بما أن المادة ناخذها في الكورسين بكون عليها 50% الفصل الأول و 50% الفصل الثاني.
M5: Human Systems II
هذي بعد نفس اللي فوق و ناخذها على الفصلين.
M6: Professionalism in the Health Sciences
ناخذها على الفصلين، فيها أشياء واجد (محاضرات، حصص مكتبية، أشياء اونلاين، كويزات، مشاريع..الخ). فكرت أشرحها بالتفصيل بس ما أحس يسوى لأن اني نفسي اتخربط فيها و في أشياء مختلفة لكل فصل. المهم أنها مادة الكل يقدر يجيب فيها فوق لأنها ما تتطلب دراسة مواد علمية و أحب أقول بعد أن هذي هي المادة اللي تنقسم فيها الدفعة إلى قسمين حسب درجة امتحان الـIELTS: إذا جايبين 6.5 فما فوق تكونون Mainstream و إذا جايبين أقل تكونون Language Students و كل قسم عنده مسؤوليات و جدول غير فيما يخص هالمادة بس يعني المحاضرات مثل ما قلنا تحضرها الدفعة كامل و التتوريال القروب يكون فيه Mainstream و Language. طلبة اللغة يصير عندهم حصة إضافية شبه يومياً –اللعام كانت من 10:30-11:20- و احنا في هذا الوقت ما كان عدنا شي. طبعاً كان عندهم امتحانات بس ما فهمت سالفتهم عدل.
M7: Introduction to Disease, Diagnostics, and Therapeutics
هذي أخذناها الفصل الثاني بس، مادة ممتعة تتكلم عن الأمراض و مسببات الأمراض، طرق التشخيص و العلاج. أكثر مادة تقدرون تتوسعون فيها من وجهة نظري لأنه هذا المجال لا حد له و كل يوم في شي جديد.
M8: Biomedical Laboratory Sciences
أخذناها على الفصلين و هي عبارة عن مادة اللاب، بعد مادة تقدرون تجيبون فيها فوق لأنها تتناول الجانب العملي. في درجات على الـLab Book حوالي 20%، و في امتحان نهائي اختيار من متعدد عليه 30%. طبعاً يجي الدكتور و يتكلم عن الموضوع، يشرح شوي إذا يحتاج شرح، و بعدين تشتغلون بروحكم ويا زميل و تحلون في الكتاب. كل كورس فيه ستة لابات، مدة اللاب الواحد ثلاث ساعات مرة كل أسبوعين و بتكونون مع نفس القروب اللي انتون وياهم في التتوريال.
M9: Medicinal and Pharmaceutical Chemistry II
أخذناها الفصل الثاني و هي امتداد لمحاضرات الكيمياء العضوية من M2. مادة حليوة و لكن يبي ليها دراسة أول بأول عشان تلحقون و إلا فإنها بتصير مو حليوة. هني يبدأ تدفق المعلومات الجديدة اللي ما أخذناها في الثانوي و لذلك نحتاج نشتغل على روحنا هني عدل.
هذا كان بالنسبة للمواد و طريقة الدراسة، نجي الحين للأسئلة اللي توصلني.
1) يعني ما في كتب؟
لا، مثل ما قلنا المحاضرات تكون على شكل بوربوينت و لكن في نهاية المحاضرة يحطون الكتب اللي استخدموها في إنشائها، و إذا في أي مصادر ثانية كالنت مثلاً يحطون لنك و هني لكم الخيار في أن تكتفون باللي موجود في المحاضرة أو تروحون تقرون زيادة.
2) هل تنصحين بالكتب و التوسع أو الاكتفاء بالمحاضرة؟
ما أقدر أقول أنصح أو ما أنصح لأن كل شخص و طريقته و سرعته في التعلم بعد – يعني يمكن في محاضرة اني أقعد عليها ساعة أخلصها و أروح اقرأ/أتوسع فيها و يمديني الحق ويا المواد الباقي في نفس الوقت في حين أن شخص آخر يستغرق في نفس المحاضرة ساعتين أو حتى ثلاث. القراءة و التوسع أكيد يعززون الفهم و الإدراك، يساعدونكم تكتبون أكثر و بطريقة علمية أكثر في الامتحان و يساعدونكم مستقبلاً بعد لأنكم ما تبون تكونون محدودين بإطار معين و هو المحاضرة، و لكن من المهم جداً معرفة أن الامتحان ما بجي من بره المحاضرة بعد يعني إذا تحسون روحكم ما تقدرون تقرون من أول سنة مو مشكلة لأنكم مطالبين بالنجاح و هي مرحلة جديدة و صعبة أما إذا تحسون روحكم تقدرون فشيء جداً جميل و بالتوفيق.
3) شلون كنتين تدرسين المحاضرات/ هل كنتين تحضرين ليهم من قبل؟
أحب اطلع على موضوع المحاضرة قبل لا ناخذها – ما كنت أروح اقرأ كلشي و افصفص سلايد سلايد بس كنت أتصفح البرزنتيشن حتى لو الصبح قبل لا يدخل الدكتور عشان أكون فكرة عن الموضوع. أدرس المحاضرة دايركت عقب ما نخلصها في نفس اليوم – ساعات ننشغل بتتوريالات أو لابات فما أقدر أدرس المحاضرة عدل في نفس اليوم و لكن أحاول قد ما أقدر أمر عليها و لو سريع قبل النوم و اتأكد أنها تندرس بطريقة أو بأخرى بحيث ما ندخل أسبوع جديد الا و اني قاضية على جميع محاضرات الأسبوع اللي طاف بس عموماً أخلصهم أول بأول و اقرأ عن الموضوع أكثر بعد ما نخلص جزئية معقولة من محاضراته. بعض المواضيع كنت أطالع لها فيديوات بعد ما أخلصها بس كان في ناس ويايي يفضلون يطالعون قبل – انتون و اللي يريحكم.
4) قلتين ان الكمية كبيرة، شلون ترتبين أفكارش و تتأكدين ان ما يجي وقت الامتحان إلا و انتين مستعدة؟
طريقة الاستعداد للامتحان تختلف من شخص لآخر – طبعاً الدراسة أول بأول تلعب دور كبير، و لكن الشطارة تكمن في انكم تدخلون الامتحان مستعدين لمواجهة أي سؤال يعترض الطريق. وجدت أن الطريق لتحقيق هذي الشطارة هو التنويع في أساليب التعلم يعني أيام المدرسة كنت أدرس بس من الكتاب و على الله السلام لكن هني ما ينفع بس تدرس من المحاضرة أو بس تدرس من الفيديو أو بس تدرس من ملخصات ناس غيرك كاتبينها – لازم تتدربون على الكتابة، سووا نوتس، اشرحوا حق أحد بيسمعكم، طالعوا فيديوات، اقرأوا في حدود المعقول إذا عندكم وقت..الخ. عقب ما تجربون أكثر من أسلوب حددوا الأسلوب اللي يفيدكم أكثر شي و ركزوا عليه بس بعد دوروا وقت للأساليب الثانية. شخصياً أحب النوتس و أحس الصور و الخرائط المفاهيمية تسهل عليي الموضوع فكنت أكتب نوتس و أرسم و أسوي ليي مخططات و أشكال البعض في الدفتر و الباقي على جدران الغرفة و في الشنطة –كل مكان حقيقةً- بحيث وين ما التفت بجوف عندي شي وهذي هي الطريقة اللي كنت أرتب فيها أفكاري (عن طريق "العفسة"). في نفس الوقت كنت أطالع فيديوات بس مو واجد بالنسبة لغيري، و كنت اقرأ بعد الكتب اللي ينصحون بهم الدكاترة.
5) تنصحين نشتري الكتب اللي ينصحون بها الدكاترة؟
ناس من ربعي اشتروا بس أني كنت استعيرهم من المكتبة و السبب أنهم مو بس كتاب واحد يعني ساعات دكتور مادة وحدة ينصح بثلاثة كتب مختلفة لما تفتحونهم تجوفون ما في فرق بينهم في الجزئية اللي قاعدين نتكلم عنها و الدكتور يقول هذا الشي أن اختاروا أي واحد منهم تتطلعون عليه- بس شخصياً ما أحب أتعلق بكتاب واحد أحب أجوفهم كلهم و أقارن بينهم خصوصاً من ناحية الصور و الـDiagrams. عموماً معظم اللي اشتروا في النهاية قالوا انهم ما بيشترون السنة الجاية لأن ما كان ليه داعي من أساس و القرار يعود لكم.
6) أصعب شي واجهتينه في فاونديشن؟
تنظيم حياتي و أولوياتي بطريقة تمكني أجيب التفوق، بالإضافة إلى تنظيم الوقت خلال السنة و خلال الامتحان نفسه بعد لأن الوقت جداً ضيق و الأسئلة تحتاج وقت للإجابة عليها بصورة وافية.
-----------------------------------------------------------------
القسم الرابع: رأيي و أسئلة متكررة
واحد من أكثر الأسئلة اللي انسأل اياها: لو يرجع الزمن تردين تختارين التخصص؟
إجابتي هي بالتأكيد نعم – التخصص جميل و ممتع لأبعد الحدود و مستحيل كنت بختار شي ثاني. صدق صعب و في هالجامعة بالذات بعد الحياة و ما فيها تصير أصعب، و لكن شعور انك كل يوم تتعلم شي جديد و ترتقي بفكرك يتغلب على كل شعور بالتعب و اليأس.
سؤال بعد يتكرر على طول: شنو يعجبش في الجامعة؟
واجد أشياء تعجبني و سبق و أبديت رايي فيها و لكن من أكثر الأمور اللي تعجبني تعاون الطلبة ويا بعضهم البعض – أحسنا عائلة كبيرة الأخوان الكبار فيها يساعدون الصغار و ما يبخلون عليهم بأي شي. هذا الشي جداً ملاحظ في الجامعة الكل يتمنى الخير للجميع و هذي الأخلاقيات تلعب دور في تأكيد أهلية الشخص في أنه يكون طبيب أو لا.
حبيت بعد أبدي رايي في السؤال الأزلي: أي أحسن جامعتكم أو جامعة الخليج العربي؟
هني أحب أذكر مقولة قريتها واحد كاتبنها في أحد مواقع التواصل بس مو ذاكرة الشخصية مين. يقول بما معناه أن ما في أفضل جامعة لدراسة الطب و إنما في أحسن طالب لدراسة الطب. الجملة جابتها في الصميم: قد تصادف دكتور متخرج من جامعة الخليج العربي أحسن من دكتور متخرج من جامعتنا أو العكس – أحب أضيف أن الجامعتين قواي على رغم الاختلاف الكبير في الأنظمة و طريقة الدراسة. جامعة الخليج العربي من الجامعات العريقة في المنطقة، و هي قوة لا يُستهان بها و تخرج كفاءات رائعة كل سنة و مو من حق أي أحد يقلل من شأنها أو شأن من طلبتها اللي هم اخوانا و زملائنا في المهنة. أحب أقول بعد أن في تعاون بين الجامعتين على مشاريع عديدة و بحوث – احنا نروح عندهم و هم يجون عدنا.
كلمة أخيرة: لكل الطلبة المقبلين على دراسة الطب –سواء في جامعتنا أو غيرها- عليكم أن تثبتون نفسكم في الساحة لأن التنافس فيها شديد جداً جداً جداً – جدُّوا، اجتهدوا، و تميّزوا، و لكن اهم شي تحافظون على مستوى عالي من الأخلاق. ما أجمل شعور أنكم تمشون في الجامعة و الكل ينظر إليكم بنظرة كلها احترام و انتون اللي في أيدكم هذا الشي.
أدري أني كتبت موضوع طويل جداً – كنت أتمنى لو قدرت أكتبه قبل بس ما جتني الفكرة الا متأخر و استغرق الموضوع عدة أيام حق يطلع بهالصورة. أتمنى أن يكون طرحي للموضوع مفيداً، اعذروني على أي قصور، اعلموا أن استفساراتكم مرحب بها، و ختاماً بالتوفيق لكم أينما ذهبتم.
توقيع » Nawreez
إن الذي يرتجي شيئاً بهمّتهِ .. يلقاهُ لو حاربَتْهُ الانسُ والجنُ .. ُّفاقصد الى قمم الاشياءِ تدركها تجري الرياح كما رادت لها السفنُ .
  رد مع اقتباس
قديم 29-07-2016, 09:47 PM   رقم المشاركة : ( 2 )
rooh2007
طالب نشيط


الملف الشخصي

رقــم العضويـــة : 127052
تاريخ التسجيل : 07-03-2016
المشاركـــــــات : 159 [+]
الـــــــــــتخصص : مستوى أول
الـــــــــــمدرسة : غير معروف

 اخر مواضيع العضو

rooh2007 غير متواجد حالياً

افتراضي

يعطيكي العافية موضوع وايد حلوة واستفدت منه.
  رد مع اقتباس
قديم 31-07-2016, 10:49 PM   رقم المشاركة : ( 3 )
Ahmed MD
طالب مشارك

الصورة الرمزية Ahmed MD

الملف الشخصي

رقــم العضويـــة : 106978
تاريخ التسجيل : 22-04-2015
المشاركـــــــات : 61 [+]
الـــــــــــتخصص : طالب جامعي
الـــــــــــجـامعة : RCSI-MUB

 اخر مواضيع العضو

Ahmed MD غير متواجد حالياً

افتراضي

يعطيش العافية .. موضوع جداً جميل،
سؤال:
اقتباس:
و لكن من المهم جداً معرفة أن الامتحان ما بجي من بره المحاضرة
هل قصدش سنتك فقط (الفاونديشن) او كل السنوات؟
توقيع » Ahmed MD
  رد مع اقتباس
قديم 07-08-2016, 04:08 PM   رقم المشاركة : ( 4 )
اتعلم
طالب مبتدئ


الملف الشخصي

رقــم العضويـــة : 122664
تاريخ التسجيل : 04-01-2016
المشاركـــــــات : 5 [+]
الـــــــــــتخصص : مستوى أول
الـــــــــــمدرسة : غير معروف

 اخر مواضيع العضو

اتعلم غير متواجد حالياً

افتراضي

عندي استفسار الايلتس ينقسم قسمين ال general و ال academic الجامعة تطلب أي واحد؟
  رد مع اقتباس
قديم 14-10-2016, 12:39 PM   رقم المشاركة : ( 5 )
n0oo0ri61
طالب مبتدئ


الملف الشخصي

رقــم العضويـــة : 133016
تاريخ التسجيل : 25-05-2016
المشاركـــــــات : 7 [+]
الـــــــــــتخصص : مستوى ثاني - حيا و كيم
الـــــــــــمدرسة : سترة الثانوية

 اخر مواضيع العضو

n0oo0ri61 غير متواجد حالياً

افتراضي

ع اي اساس يتم القبول في الجامعه الايرلنديه؟
  رد مع اقتباس
قديم 22-11-2016, 03:48 PM   رقم المشاركة : ( 6 )
Mina Zuhair
طالب مبتدئ


الملف الشخصي

رقــم العضويـــة : 117681
تاريخ التسجيل : 10-11-2015
المشاركـــــــات : 1 [+]
الـــــــــــتخصص : مستوى أول
الـــــــــــمدرسة : غير معروف

 اخر مواضيع العضو

Mina Zuhair غير متواجد حالياً

افتراضي

شكراً جزيلاً
  رد مع اقتباس
قديم 12-02-2019, 02:32 PM   رقم المشاركة : ( 7 )
حموود المنتصر
طالب نشيط

الصورة الرمزية حموود المنتصر

الملف الشخصي

رقــم العضويـــة : 17387
تاريخ التسجيل : 08-01-2011
المشاركـــــــات : 200 [+]
الـــــــــــتخصص : توجيهي - حيا و كيم
الـــــــــــمدرسة : الهدايه الخليفيه للبنين

 اخر مواضيع العضو

حموود المنتصر غير متواجد حالياً

افتراضي

أجمالي المبلغ الأربع سنوات كم يكون لطلاب التمريض
توقيع » حموود المنتصر
  رد مع اقتباس
قديم 12-02-2019, 02:34 PM   رقم المشاركة : ( 8 )
الحر_الأسير
طالب نشيط


الملف الشخصي

رقــم العضويـــة : 126662
تاريخ التسجيل : 26-02-2016
المشاركـــــــات : 152 [+]
الـــــــــــتخصص : طالب جامعي
الـــــــــــمدرسة : جامعة البحرين الطبية

 اخر مواضيع العضو

الحر_الأسير غير متواجد حالياً

افتراضي

تقريبا اذا في السنة في حدود 4 الاف و شي يعني على اربع سنوات يمكن بين 16 الف الى 17 الف
  رد مع اقتباس
قديم 19-05-2019, 07:24 PM   رقم المشاركة : ( 9 )
Queenofdark
طالب مبتدئ


الملف الشخصي

رقــم العضويـــة : 182098
تاريخ التسجيل : 18-05-2019
المشاركـــــــات : 3 [+]
الـــــــــــتخصص : مستوى أول
الـــــــــــمدرسة : غير معروف

 اخر مواضيع العضو

Queenofdark غير متواجد حالياً

افتراضي

في تخصص بكالوريوس في مختبرات الطبية
  رد مع اقتباس
قديم 20-05-2019, 03:13 AM   رقم المشاركة : ( 10 )
الحر_الأسير
طالب نشيط


الملف الشخصي

رقــم العضويـــة : 126662
تاريخ التسجيل : 26-02-2016
المشاركـــــــات : 152 [+]
الـــــــــــتخصص : طالب جامعي
الـــــــــــمدرسة : جامعة البحرين الطبية

 اخر مواضيع العضو

الحر_الأسير غير متواجد حالياً

افتراضي

اقتباس:
المشاركة الأصلية كتبت بواسطة queenofdark مشاهدة المشاركة
في تخصص بكالوريوس في مختبرات الطبية
لا يوجد ، في بس تمريض و طب
المختبرات الطبية موجودة في كلية العلوم الصحية التابعة لجامعة البحرين
  رد مع اقتباس
قديم 25-05-2019, 09:14 PM   رقم المشاركة : ( 11 )
شوق محمد صالح
طالب مشارك

الصورة الرمزية شوق محمد صالح

الملف الشخصي

رقــم العضويـــة : 180163
تاريخ التسجيل : 01-04-2019
المشاركـــــــات : 67 [+]
الـــــــــــتخصص : مستوى ثاني - حيا و كيم
الـــــــــــمدرسة : المعرفة الثانوية للبنات

 اخر مواضيع العضو

شوق محمد صالح غير متواجد حالياً

افتراضي

في صيدلة في الجامعة الايرلندية, واي معدل يقبلون فيه ؟ ما بين 90 و 80 او 90 و فوق؟؟؟؟؟؟؟
توقيع » شوق محمد صالح
Remember that failure is not the opposite of success it is a part of success
  رد مع اقتباس
قديم 25-05-2019, 09:43 PM   رقم المشاركة : ( 12 )
الحر_الأسير
طالب نشيط


الملف الشخصي

رقــم العضويـــة : 126662
تاريخ التسجيل : 26-02-2016
المشاركـــــــات : 152 [+]
الـــــــــــتخصص : طالب جامعي
الـــــــــــمدرسة : جامعة البحرين الطبية

 اخر مواضيع العضو

الحر_الأسير غير متواجد حالياً

افتراضي

لا يوجد ، في بس تمريض و طب
الصيدلة موجودة في كلية العلوم الصحية التابعة لجامعة البحرين
  رد مع اقتباس
قديم 29-10-2019, 04:20 PM   رقم المشاركة : ( 13 )
Silent Night
طالب مجتهد

الصورة الرمزية Silent Night

الملف الشخصي

رقــم العضويـــة : 153375
تاريخ التسجيل : 26-05-2017
المشاركـــــــات : 266 [+]
الـــــــــــتخصص : طالب جامعي
الـــــــــــجـامعة : UOB

 اخر مواضيع العضو

Silent Night غير متواجد حالياً

افتراضي

انا سمعت شي بس مو متأكد

يقولون المتفوق اللي معدله 90 فما فوق يعطونه منحه و يدرس ببلاش .

هل هالكلام صح و لا غلط ؟؟؟
توقيع » Silent Night
𝐈𝐭'𝐬 𝐥𝐢𝐤𝐞 𝐡𝐨𝐦𝐞 𝐛𝐮𝐭 𝐢𝐭'𝐬 𝐬𝐨 𝐝𝐚𝐫𝐤, 𝐈𝐭'𝐬 𝐬𝐨 𝐝𝐚𝐫𝐤 𝐚𝐧𝐝 𝐞𝐦𝐩𝐭𝐲
  رد مع اقتباس
قديم 21-11-2019, 12:30 PM   رقم المشاركة : ( 14 )
الحر_الأسير
طالب نشيط


الملف الشخصي

رقــم العضويـــة : 126662
تاريخ التسجيل : 26-02-2016
المشاركـــــــات : 152 [+]
الـــــــــــتخصص : طالب جامعي
الـــــــــــمدرسة : جامعة البحرين الطبية

 اخر مواضيع العضو

الحر_الأسير غير متواجد حالياً

افتراضي

اقتباس:
المشاركة الأصلية كتبت بواسطة kid killer مشاهدة المشاركة
انا سمعت شي بس مو متأكد

يقولون المتفوق اللي معدله 90 فما فوق يعطونه منحه و يدرس ببلاش .

هل هالكلام صح و لا غلط ؟؟؟
قصدك الجامعة او الوزارة؟
اذا قصدك الجامعة من سنتين لما سجلت كان القبول من 92 ما ادري اذا تغير او لا الحين
و سمعت ان يعطون الجامعة بعثات للأوائل بس ما اعرف شروطها و كأنها مو اعفاء من الرسوم اعتقد بس خصم
تأكد من الجامعة يكون افضل
  رد مع اقتباس
قديم 27-11-2019, 09:26 AM   رقم المشاركة : ( 15 )
alkaabi15
طالب مبتدئ


الملف الشخصي

رقــم العضويـــة : 157491
تاريخ التسجيل : 31-10-2017
المشاركـــــــات : 28 [+]
الـــــــــــتخصص : مستوى أول
الـــــــــــمدرسة : غير معروف

 اخر مواضيع العضو

alkaabi15 غير متواجد حالياً

افتراضي

متى يفتحون القوة ؟
  رد مع اقتباس
الأعضاء الذين أرسلوا إعجاب لـ alkaabi15 على المشاركة المفيدة:
مجهول14 (07-02-2021)
إضافة رد

مواقع النشر (المفضلة)

أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع



Powered by vBulletin® © 2024
الساعة الآن 04:45 PM.
ملاحظة: جميع المشاركات والتعليقات في الملتقى لا تمثل رأي الإدارة، وإنما تمثل رأي كاتبها.